Mektepte sabaqty úsh tilde oqytý úshin 6740 muǵalim oqytylǵan. Biraq tek 818 pedagog sabaqty tolyq aǵylshyn tilinde ótkizedi. Degenmen barlyǵy birdei ai saiyn 35 394 teńge qosymsha aqy alyp otyr.
Bul týraly búgingi Májilistiń jalpy otyrysynda depýtat Jámila Nurmambetova aityp, BǴM Kúlásh Shámshidinovadan sabaqty ártúrli ótkizgen muǵalimder nelikten birdei qosymsha aqy alatynyn surady.
«Meniń suraǵym úshtildi bilim berý júiesine bailanysty. Úkimettiń 2018 jylǵy esebine súiensek, respýblikalyq biýdjetten 1,6 mlrd teńgeden astam aqsha til kýrstarynan ótken 6740 muǵalimniń jalaqysyna qosymsha tólem retinde bólingen. Biraq kórsetilgen 6740 muǵalimniń barlyǵy til kýrstarynan ótti, alaida 818 muǵalim, iaǵni 12%-y ǵana tolyq formatta – sabaqty tolyq aǵylshyn tilinde ótkizedi. Al qalǵan 5922 pedagog ishinara qamtý arqyly sabaq ótkizedi. Degenmen oqýshylardyń eki kategoriiasy da birdei qosymsha tólemaqy – ai saiyn 35 394 teńge alady. Sonda til kýrstarynan ótkenmen, sabaqty tolyq aǵylshyn tilinde ótkize almaidy. Bul jerde aǵylshyn tilin túrli deńgeidegi sabaq ótkize otyryp, birdei qosymsha aqy alady», - dedi Jámila Nurmambetova.
Buǵan Kúlásh Shámshidinova qazir máseleni talqylap jatqanyn aitty.
«Pánderdi shetel tilinde úiretýge bailanysty kóptegen suraq boldy. Aǵylshyn tilinde sabaq berýdi úsh jaǵdaida bastaý kerek bolatyn... Barlyǵyna birdei qosymsha aqy tóleý sheshimi o bastan qabyldanyp qoiǵan. Qazir kimge qosymsha aqy tólený kerek, kimge tólenbeý kerek ekenin naqtylaý úshin máseleni qarastyryp, talqylap jatyrmyz», - dedi bilim jáne ǵylym ministri.
Al Májilis tóraǵasy Nyǵmatýlin ministrge «aqshany muǵalimniń bilimi úshin emes, jai qaǵaz úshin tólep, osyndai bilim júiesine balalar men ata-analar «baǵa» beredi» degendi aitty.
«Munda talqylaityn ne bar? Sizder talqylaǵanǵa deiin 1,6 mlrd teńge tólep qoidy. Kúlásh Noǵataiqyzy, siz tildi bilgeni úshin emes, siz A4 formatyndaǵy sertifikatqa qosymsha aqy tólep jatyrsyz degen sóz. Ashyǵyn aitqanda, bul sizge strategiialyq jospardaǵy esep kórsetkishin jaqsartýǵa múmkindik beredi. Sondyqtan Esep komitetiniń esebinde barlyǵy jaqsy bolyp kórinedi. Al teksere bastasaq... Siz retteimiz degenge deiin... Retteitin túgi joq. Buiryq shyǵaryńyz. Bilimi sáikes kelmese, tólenbeý kerek. Muǵalimderge stimýl bolý kerek. Osyndai kásibi emes bilim júiesiniń kesirinen bilim berý sapasy zardap shegedi. Eshkim úshtilde bilim berý kerek emes demeidi. Biraq muny bul jumysty esep úshin emes, aqylmen, durys isteý kerek. Bul jaǵdai oqýshylarǵa ne olardyń ata-analaryna tanys. Mine solar bizdiń osyndai jumysymyzǵa baǵa beredi», - dedi Nurlan Nyǵmatýlin.
