QR Parlamenti Májilisiniń jalpy otyrysynda Bilim jáne ǵylym ministri Ashat Aimaǵambetov«Pedagog mártebesi týraly» zań jobasyn tanystyrdy, – dep habarlaidy «Ult aqparat».
«Memleket basshysynyń Tamyz konferentsiiasynda bergen tapsyrmasy aiasyna aldaǵy 4 jyl ishinde muǵalimderdiń jalaqysy 2 esege artady. Bul kelesi jyldan bastap muǵalimderdiń jalaqysy 25 paiyzǵa kóbeiedi degen sóz. Árine, osy másele boiynsha pedagogtardyń ishinde biraz úrei de bar. «Jalaqyny kótergende bazalyq laýazymdyq jalaqyny alyp, sony ǵana kótere salady eken« degen siiaqty oilar aitylýda. Sondyqtan bul másele Prezidenttiń bizge bergen tapsyrmasynyń aiasynda jalpy muǵalimniń jalaqysyna qatysty bolady dep aitqym keledi jáne qańtar aiynan bastap bul jumys júrgiziledi» dedi ministr.
Onyń atap ótýinshe, zań jobasynda synyp jetekshiligi men dápter teksergeni úshin pedagogterge 2 ese mólsherde qosymsha aqy tóleý kózdelgen. Bul norma elimiz boiynsha 182 myń synyp jetekshisine jáne dápter teksergeni úshin ústemeaqy alatyn 165 myń muǵalimge qatysty.
«Sondai-aq barlyq pedagogtar úshin demalys kezeńin 56 kúnge deiin ulǵaitý qarastyrylady. Bul norma búgingi kúni 110 myń áriptesimizge qatysty. Búginde olar 42 kún ǵana demalatyn bolsa, endi 56 kún eńbek demalys alady» dedi ol.
A.Aimaǵambetovtiń atap ótýinshe, tálimgerlik úshin pedagogterge jyl boiy 17 myń teńge qosymsha aqy berý de usynylyp otyr.
«Magistr ataǵy bar ustazdar sany boiynsha biz basqa memlekettermen salystyrǵanda ókinishke orai sońǵy qatarda kele jatyrmyz. Sondyqtan bul máseleni de qolǵa alyp otyrmyz. Eger magistr ataǵy bar pedagog mektepke kelip jumys isteitin bolsa, olarǵa 10 AEK mólsherinde qosymsha aqy tóleý kózdeledi» dedi ministr.
