QR Bilim jáne ǵylym ministri Ashat Aimaǵambetov «Bolashaq» halyqaralyq baǵdarlamasynyń túlekterimen kezdesti, dep habarlaidy "Ult aqparat" ministrliktiń baspasóz qyzmetine silteme jasap.
Kezdesý QR Tuńǵysh Prezidenti – Elbasy N.Nazarbaevtyń jarlyǵymen 1993 jylǵy 5 qarashada taǵaiyndalǵan stipendiianyń 27 jyldyǵyna orai uiymdastyryldy.
«Biyl aitarlyqtai ózgerister kúshine endi. Biz stipendiiany taǵaiyndaý úrdisin avtomattandyrý men ashyqtyqty arttyrý úshin barlyq normativtik quqyqtyq qujatty pysyqtadyq. Memleket basshysy ótken jyly osyndai mindet qoidy. Qasym-Jomart Kemeluly (Prezident – red.) bul baǵdarlamany odan ári damytýǵa jáne ony qoldaýǵa erekshe kóńil bóledi», – dep atap ótti Aimaǵambetov.
Ministrdiń aitýynsha, halyqaralyq stipendiiaǵa úmitkerlerdi irikteýdiń jańa erejeleri bekitildi. Kvotalyq sanattar joiylyp, konkýrstyq irikteýde barlyq úmitkerge teń múmkindikter beredi. Sheteldik jetekshi JOO tizimindegi oqý ornynan shaqyrtýdyń bolýy – stipendiia taǵaiyndaý boiynsha konkýrsqa qatysý úshin qoiylatyn negizgi talap. Aýyldyq eldimekenderden qatysatyn úmitkerler úshin Qazaqstan aýmaǵynda 6 aiǵa deiingi tildik kýrstar saqtalady.
«Tek aýyldyq jerlerden kelgen úmitkerler úshin tildik kýrstardy saqtaý arqyly biz jyl saiyn 1,3 mlrd teńgeden astam qarajat únemdeimiz. Sondai-aq irikteý kezeńderin 6-dan 3-ke deiin azaityp, jalpy qujat qabyldaý protsesin tsifrlandyrdyq. Úmitkerlerdi irikteýdiń barlyq kezeńi videoquraldar kómegimen tirkeledi. Biz tolyq ashyqtyqty qamtamasyz ettik jáne jańa syn-tegeýrinderge ikemdi áreket etemiz», - dedi Ashat Aimaǵambetov.
«Bolashaq» baǵdarlamasy búginge deiin 13 978 stipendiia taǵaiyndady, onyń ishinde 1994 jyldan 2004 jylǵa deiin – 785 stipendiia, 2005-2020 jyldary – 13193 stipendiia berilgen. 13 193 stipendiianyń 3379-y bakalavriat boiynsha, 7231 – magistratýra, 35 – aspirantýra, 87 – klinikalyq ordinatýra, 347 – doktorantýra, 2114 – taǵylymdama baǵdarlamasy boiynsha tirkelgen.
