Elimizdiń bilim ordalaryndaǵy beinebaqylaý júiesinde bolǵan kemshilikter 2 aidyń ishinde joiylýy tiis. Bul týraly Bilim jáne ǵylym ministri Ashat Aimaǵambetov, dep habarlaidy QazAqparat.
«Balabaqshada bolsyn, mektepte bolsyn, koledjde bolsyn beinebaqylaý qaýipsizdik úshin óte mańyzdy. Ótken jyly bilim oshaqtarynyń beinebaqylaýmen qamtylýy 75 paiyz bolsa, qazir 99 paiyzǵa jetti. Biraq, bizge sany emes, sapasy kerek», - dedi Ashat Aimaǵambetov ministrliktiń apparat keńesi barysynda.
Sondyqtan da ol Ishki ister jáne Bilim ministrlikteriniń buiryqtary shyqqanyn atap ótti.
«Osy qujatqa bailanysty naqty talaptar qoiylǵan. Beinebaqylaý júieleri osy talaptarǵa sai bolýy kerek. Sol sebepti biz bul máseleni eki aidan keiin, jeltoqsan aiynda qaraityn bolamyz. Eki aidyń ishinde anyqtalǵan kemshilikterdi joiýdy tapsyramyn. Bul máseleni baqylaýda ustaýlaryńyz qajet dep sanaimyn», - dedi ministr.
