Bilim berý máseleleri jónindegi zańnamaǵa engizilgen jańa túzetýler joǵary jáne joǵary oqý ornynan keiingi bilim deńgeiin de qamtydy. Bul týraly Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Endi joǵary oqý oryndarynda oqý jetistikterin syrttai baǵalaý protsedýrasy júrgizilmeidi. Joǵary oqý oryndaryna akademiialyq erkindik berilgen. Ár JOO oqý baǵdarlamalaryn óz betinshe ázirleidi. Sondyqtan mundai baǵalaý túrin júrgizýdiń qajeti joq», - dep túsindirdi ministr áleýmettik jelidegi paraqshasynda.
Onyń aitýynsha, bilim alǵanyn rastaityn ózindik úlgidegi qujattardyń mazmunyna, olardy esepke alý jáne berý tártibine qoiylatyn talaptar da zań negizinde aiqyndaldy.
«2021 jyldan bastap árbir joǵary oqý orny bilim alǵan azamattarǵa jeke úlgisi boiynsha diplom beretin bolady. Iaǵni, endi ár joǵary oqý ornynda beriletin diplomdardyń barlyǵy birkelki bolmaidy. Ár oqý orny jeke brendke ainalyp, stýdentter oqý oryndaryn bilim berý sapasyna qarai tańdaityn bolady. Budan bylai memlekettik úlgidegi diplomdar berilmeidi», - dedi Aimaǵambetov.
«Sondyqtan zańsyz nemese jalǵan qujat ainalymyna jol bermeý maqsatynda tiisti sharalar qabyldandy. Máselen, bilim berilgenin rastaityn qujatty esepke alý jáne seriialyq nómirleri boiynsha bir júiege keltirý úshin diplomdardyń mazmunyna qatysty biryńǵai minimaldy talaptar qarastyrylǵan. BǴM-niń aqparattyq júiesinde berilgen diplomdardyń depozitarii, rekvizitteri bolady, sondai-aq Bolon protsesiniń talaptaryna sai Diploma Supllement berý qarastyrylady», - dep naqtylady vedomstvo basshysy.
