Bilim berý, ǵylym salasyndaǵy túitkildi máseleler QR Prezidenti Qasym-Jomart Toqaevtyń qatysýymen ótken Ulttyq qoǵamdyq senim keńesinde keńinen aityldy. QR Bilim berý isiniń úzdigi, sheber-pedagog Boranbai Májenovtiń pikirinshe, Memleket basshysynyń bilim berý salasyn damytýǵa qatysty aitqan tapsyrmalary óte ózekti, dep habarlaidy QazAqparat.
Boranbai Májenov Nur-Sultan qalasyndaǵy №38 mektep-litseide tarih páninen sabaq beredi. Tájiribeli ustazdyń pikirinshe, bilim berý salasyn reformalaýǵa qatysty máseleler qoǵamda kópten beri talqylanyp keledi. Eldiń bilim men ǵylym salasy myqty bolmai, ekonomikasy esh ýaqytta turaqty dami almaidy.
«Qoǵamdyq keńes otyrysynda Prezidentimiz sheshilýi qajet máselelerdi aityp ótti. Sonyń biri - synyptardaǵy oqýshylardyń sanyn azaitý. Mysaly Nur-Sultan qalasyndaǵy mektepterdi alatyn bolsaq, qazaq mektepterine balalar syimaidy. Bir synypta 38-40 baladan otyrǵandary bar. Máselen № 38 mektep 700 balaǵa arnalsa, shyn máninde onda 2,5 myń bala oqyp jatyr, eki aýysymmen. Osynyń ózi bilim sapasyna keri áser etetini túsinikti», - deidi sheber-pedagog.
Onyń aitýynsha, 2,5 myń balaǵa bir ǵana sport zaly bar. Dene shynyqtyrý sabaǵyna aptasyna 3 saǵat berilgen. Barlyq synyp bir sport zalynda jattyǵýǵa májbúr.
«Memlekettik baǵdarlama boiynsha 2025 jylǵa deiin elimizde 650 myń bala syiatyn 800 mekteptiń salynatyndyǵy aityldy. Aýyldaǵy tirek mektepterge 114 internat, 700-den astam sport zaly salynbaq eken. Oqýshylar sany jyldan-jylǵa artyp keledi. Sol sebepti jańa mektepterdiń qurylysy ózekti máseleni sheshpek», - deidi Boranbai Májenov.
Mektepterge basshylardy sailaýda da oilanarlyq másele bar. Pedagogtyń aitýynsha, mektepte jas ustazdar óte kóp. Olar magistratýra, doktorantýra bitirgen. Shetelde oqyp, tájiribe jinaqtap kelgenderi de bar. Búginde olar qarapaiym muǵalim bolyp eńbek etip júr.
«Jastardyń alǵan bilimin, jinaǵan tájiribesin nege paidalanyp, basshylyq qyzmetterge qoimasqa, «jas kelse – iske» degen bar emes pe?!
Prezident direktorlar arasynda rotatsiia jasap turý qajettigin de aitty. Kei direktorlar bir orynda 15-20 jyl otyrady. Myqty direktorlardy aýystyryp otyrsa, olar óz tájiribelerin basqa bilim ordalaryna engizer edi. Bul sybailas jemqorlyqqa da jol bermes edi. Direktorlar attestatsiiadan úsh jylda bir ret ótip turýy kerek degen de durys sheshim», - deidi bilim berý isiniń úzdigi.
Eńbek jolyn aýylda bastaǵan ustazǵa aýyl mektepterindegi jaǵdai jaqsy tanys. Boranbai Májenovtyń aitýynsha, qala men aýyl mektepterinde aiyrmashylyq bar ekeni ras. Kei aýyldarda synyptar bos. Biraq bir muǵalim oqýshy sanynyń azdyǵynan túrli jastaǵy balalarǵa sabaqty qatar berýge májbúr. Al ol eńbekaqysynda esh eskerilmeidi.
«Muǵalim mártebesin kóterýge bailanysty kóptegen ister qolǵa alynbaq. Eńbekaqysy áli de ósedi, jumys júktemesi azaidy, túrli qaǵazbastylyqtan arylyp jatyr. Taǵy bir jaqsy jańalyq – muǵalimdikke oqyp jatqan stýdentterdiń stipendiiasyn basqalarǵa qaraǵanda 42 myń teńgege jetkizý, doktoranttardyń stipendiiasyn 150 myń teńgege deiin kóbeitý máselesi. Josparlanǵan reforma júzege assa - munyń bári birer jylda óz nátijesin bere bastaidy», - deidi Boranbai Májenov.
