Aqmola oblysynda memlekettik satyp alý arqyly bir dápterdi 95 myń teńgege satyp almaqshy bolǵan. Bul týraly Aqmola oblysy boiynsha sybailas jemqorlyqqa qarsy is-qimyl departamentiniń basshysy Arman Rahimovtyń qatysýymen ótken baǵany kóterý jáne biýdjet qarajatyn maqsatsyz paidalanýdy boldyrmaý faktilerin anyqtaý maqsatynda memlekettik satyp alý monitoringiniń nátijeleri týraly onlain-brifingte aityldy, dep habarlaidy QazAqparat.
«Memlekettik satyp alý salasy sybailas jemqorlyq is-áreketterin jasaý úshin qolaily orta bolyp tabylatyny eshkimge qupiia emes, jyl saiyn osy salada myńdaǵan zań buzýshylyqtar anyqtalady. Osyǵan orai, Sybailas jemqorlyq táýekelderiniń aldyn alý úshin Departament «satyp alýdyń biryńǵai terezesi» portaly arqyly memlekettik satyp alýlarǵa monitoring júrgizedi, onyń qorytyndysy boiynsha memlekettik organdar men uiymdarǵa tiisti usynymdar joldanady», - dedi Arman Rahimov.
Osylaisha, jyl basynan beri monitoring sheńberinde Departament engizgen usynymdardan keiin satyp alýǵa josparlanǵan taýarlarǵa, jumystarǵa jáne qyzmetterge joǵary baǵalardy tómendetý arqyly 1 milliard teńgeden astam qarajat únemdeldi.
Mysaly, Aqmola oblysy aýdandarynyń birindegi bilim mekemesi 14 250 000 teńgege nemese bir danasyn 95 myń teńgege dápter satyp alýdy josparlaǵan. Al 1 dápterdiń ortasha naryqtyq baǵasy - 60 teńge. Departamenttiń ýaqtyly aralasýynyń arqasynda satyp alý toqtatyldy jáne biýdjet qarajaty únemdeldi. Mekemeniń túsindirýi boiynsha, dápterdiń baǵasynyń belgilengen baǵadan joǵary bolýyna memlekettik satyp alý portaly ákimshisiniń jibergen qateligi sebep bolǵan.
Sondai-aq, «Eńbek – Kókshetaý» ShJQ RMK filialy memlekettik satyp alý arqyly jalpy somasy 6 million teńgege nemese 1 kg úshin 200 teńgege suly satyp almaqshy bolǵan. Al sulynyń naryqtyq baǵasy-90 teńgeni quraidy. Osylaisha Departamenttiń ýaqtyly aralasýynyń arqasynda memlekettik satyp alýda usynylǵan baǵa tómendetilip, 3 million teńgeden astam qarjy únemdeldi.
Osy rette, Sybailas jemqorlyqqa qarsy óńirlik qyzmettiń basshysy aqmolalyqtardy biýdjet qarajatynyń jumsalýyn qoǵamdyq baqylaý aiasynda belsendi azamattyq ustanym tanytýǵa shaqyrady.
