QR Ǵylym jáne joǵary bilim ministrliginiń ókilderi biyl UBT qorytyndysy boiynsha qai baǵyttarda báseke joǵary bolatynyn aitty, dep habarlaidy QazAqparat.
Joǵary jáne joǵary oqý ornynan keiingi bilim departamentiniń direktory Gúljan Jarasovanyń aitýynsha, ázirge bir orynǵa neshe úmitker talasatynyn naqty boljaý qiyn. Óitkeni qandai baǵytqa qansha ótinish beriletini qujat tapsyrý kezinde belgili bolady.
«Biraq tutastai alsaq, byltyr pedagogikalyq mamandyqtardyń shekti baly 75-ke artqanymen, ondaǵy úmitkerlerdiń sany azaiǵan joq. Esterińizde bolsa, byltyr pedagogikalyq mamandyqtar boiynsha bir orynǵa bes adam talasqan bolatyn», - dedi Gúljan Jarasova.
Al Ulttyq testileý ortalyǵynyń direktory Rýslan Emelbaevtyń sózine qaraǵanda IT baǵyttaǵy mamandyqtar - talapkerler arasynda eń bedeldi sala.
«Tehnikalyq mamandyqtar boiynsha IT baǵyt eń joǵary suranysqa ie. Odan keiin biologiia jáne himiia tur. Bul baǵytta test tapsyrýshylardyń upaiy óte joǵary. Bulardan soń pedagogikalyq mamandyqtarda báseke joǵary bolatyn túri bar. Beiindi pánderdiń nátijesi boiynsha aitsaq, talapkerlerdiń 27% fizika-matematika kombinatsiiasyn tapsyrǵan. Tehnikalyq mamandyqtar arasynda eń bedeldisi - IT mamandyq. Ekinshi orynda 18%-ben himiia-biologiia kombinatsiiasy tur. Onyń ishinde stomatologiiaǵa suranys kóp. Úshinshi orynda pedagogikalyq mamandyqtar tur», - dedi Rýslan Emelbaev.
