Qazirgi halyqtyń basty talaby – eldegi áleýmettik jaǵdaidyń túzelýi bolyp otyr.Úisizdik, jumyssyzdyq, qymbatshylyq halyqtyń narazylyǵyn kúsheitip otyrǵany jasyryn emes. Osy máseleni túsingen El Prezidenti biyl jedel sheshim qabyldap, burynǵy Úkimetti taratty.
Jańa Úkimet jasaqtap, bes áleýmettik bastamasyn jariialady. Endi jańa Úkimettiń aldynda sony «maidan qylshyq sýyrǵandai» eptilikpen oryndaý mindeti tur. Halyqtyń aityp jatqan talaby óte oryndy. Bilik te óz halqynyń múddesi úshin qyzmet etýge mindetti. Biraq keide osy eldiń arasynda arandatýshylar da bar ma dep te alańdaimyn. Mundai sátte halyqty kóshege shyǵýǵa itermelep, «órtengen úige qoidyń basyn bas úitip» alǵysy keletinder de shyǵady. Ondai teris piǵyldylardyń nietinen saq bolýymyz kerek.
Biz «qarnynyń ashqanynan góri qadiriniń qashqanynan» qoryqqan halyqpyz. «Sabyr túbi - sary altyn» degen sańlaq babalardyń urpaǵymyz. Eń basty qundylyǵymyz – táýelsizdik pen eldiń tynyshtyǵy. Osy ekeýinen aiyrylsaq, bárinen de aiyrylamyz.
Óz basym búgingi kópbalaly analardyń ótemaqysyn ósirý, árbir otbasynyń baspanaly bolýy siiaqty Prezidenttiń tapsyrmasyn oryndaýda Úkimettiń ádiletti bolýyn talap etemin. Ákimder men ministrler elmen etene jumys isteýi kerek. Áitpese, halyqtyń narazylyǵy odan saiyn kúsheie beredi.
Aldymen, eń jaǵdaiy nashar otbasylardyń máselesi sheshilýi tiis. Turǵyn úi máselesin de jyl sońyna deiin jedel júzege asyrý qajet. Kópbalaly otbasylardyń ótemaqysy ádiletti túrde bóliný kerek. Bireýdiń qoradaǵy on taýyǵyn sanaýshylar oilanýy tiis. Munyń bári zań aiasynda, aitylǵan «bes áleýmettik bastamanyń» negizinde júzege assa deimin.
Biz, at tóbelindei az qazaq evoliýtsiialyq jolmen ósýimiz kerek. Bizge eshqandai soǵys pen búliktiń keregi joq. Alla Taǵala da Quranda «bir qiynshylyqqa sabyr etseń, artynan on jaqsylyq beremin» dep ýáde etken joq pa? Sondyqtan áliptiń artyn baqqanymyz durys pa deimin.
Serikzat Dúisenǵazynyń feisbýktaǵy jazbasynan
