Qulqynyń qamyn ultynyń arynan biik qoiǵan dúbára bilik halyqtyń qalaý-tilegin túsinýden qaldy. Olardyń bar maqsaty — jumsaq kresloǵa jambasyn jelimdep, jer-jahandy jalpaǵynan basyp júre berý. Tek júrý hám toq júrý…
Meiirim-mahabbaty kóshede qańǵyrǵan shaitan shaharda dala qazaǵynyń ókinish-muńyn júrekpen uǵynar jan qalmaǵandai. Galstýgy qarynynda bilegen shekirei sheneýnik, shalǵaidaǵy aǵaiynnyń sher-muńyn túsinbek túgil, elestete de almaidy. Sóitip keldi de, jer máselesi — ailyǵy shailyǵyna jetpei, shydamy shytynap, kókiregi tola túsken jurttyń jandy jerin tyrnap ketti… Saiqal saiasattyń nebir sandyraǵyna eriksiz bas shulǵyp kelgen qara halyq, bu jolǵy «bassyzdyqqa» shydap tura almady. Ashynǵan jurt alańǵa bettedi. Táýelsiz eldiń azat adamy retinde narazylyǵyn ashyq bildirdi. Eshqandai da «syrtqy kúshterdiń» yqpalynsyz, áldebireýlerdiń arandatýynsyz aq adal tilegin arqalap shyqty. Ashyna sóilep, keýdesin oqqa da tosýǵa daiar keiip tanytqan aq jaýlyqty ájeige qarap turyp, birinshi arnanyń tilshileri «áziliniń» óte sátsiz shyqqanyn moiyndamasqa amal joq. Bul – baǵytsyz bilikke degen qarsylyǵy qalyńdai túsken, onsyz da ashynǵan jurttyń jan-aiqaiy bolsa kerek.
Biliktiń júiesiz jumysy, jaýapkershilikten teris ainalýy, máseleni der kezinde aýyzdyqtamaýy – birneshe qaladaǵy beibit sherýge alyp keldi. Elbasy ózi toqtaý salyp, zańnyń betin qaitarmaǵanda jaǵdai odan saiyn ýshyǵyp keter me edi. Boiǵa jinalǵan bar ashý-yzasy tógile jazdaǵan kezde, moratorii týraly jańalyq estildi. Quddy bir jaýymyzdy jer jastandyrǵandai bórkimizdi aspanǵa ata qýandyq. Biraq bul – jer týraly zańnyń kúshi birjola joiyldy degen sóz emes.
Ile-shala komissiia quryp, qaita talqyǵa salýyn – kózboiaýshylyqtyń bir kórinisi emes pe dep kúmándanasyń. Máseleni sozbaqtatyp júrip, óz piǵyldaryn iske asyryp ketpese bolǵany. Áiteýir, komissiia quramynda eldiń jaiyn oilar biraz azamattarymyz boi kórsetti. Ult múddesin, jurt tilegin jerde qaldyrmas dep senemiz. Ony jeti saǵatqa sozylǵan alǵashqy otyrystan-aq baiqadyq. Kúlli qazaq bar úmit-tilegin sol kisilerge artyp otyr. Sońy jaqsy bolsyn dep tileiik.
Sherhan Talap
.jpg)
