شەرحان تالاپ. بيلٸك حالىقتىڭ قالاۋىن تٷسٸنبەيدٸ

قۇلقىنىڭ قامىن ۇلتىنىڭ ارىنان بيٸك قويعان دٷبەرا بيلٸك حالىقتىڭ قالاۋ-تٸلەگٸن تٷسٸنۋدەن قالدى. ولاردىڭ بار ماقساتى — جۇمساق كرەسلوعا جامباسىن جەلٸمدەپ, جەر-جاھاندى جالپاعىنان باسىپ جٷرە بەرۋ. تەك جٷرۋ ھەم توق جٷرۋ…

مەيٸرٸم-ماحابباتى كٶشەدە قاڭعىرعان شايتان شاھاردا دالا قازاعىنىڭ ٶكٸنٸش-مۇڭىن جٷرەكپەن ۇعىنار جان قالماعانداي. گالستۋگى قارىنىندا بيلەگەن شەكٸرەي شەنەۋنٸك, شالعايداعى اعايىننىڭ شەر-مۇڭىن تٷسٸنبەك تٷگٸل, ەلەستەتە دە المايدى. سٶيتٸپ كەلدٸ دە, جەر مەسەلەسٸ — ايلىعى شايلىعىنا جەتپەي, شىدامى شىتىناپ, كٶكٸرەگٸ تولا تٷسكەن جۇرتتىڭ جاندى جەرٸن تىرناپ كەتتٸ… سايقال ساياساتتىڭ نەبٸر ساندىراعىنا ەرٸكسٸز باس شۇلعىپ كەلگەن قارا حالىق, بۇ جولعى «باسسىزدىققا» شىداپ تۇرا المادى. اشىنعان جۇرت الاڭعا بەتتەدٸ. تەۋەلسٸز ەلدٸڭ ازات ادامى رەتٸندە نارازىلىعىن اشىق بٸلدٸردٸ. ەشقانداي دا «سىرتقى كٷشتەردٸڭ» ىقپالىنسىز, ەلدەبٸرەۋلەردٸڭ ارانداتۋىنسىز اق ادال تٸلەگٸن ارقالاپ شىقتى. اشىنا سٶيلەپ, كەۋدەسٸن وققا دا توسۋعا دايار كەيٸپ تانىتقان اق جاۋلىقتى ەجەيگە قاراپ تۇرىپ, بٸرٸنشٸ ارنانىڭ تٸلشٸلەرٸ «ەزٸلٸنٸڭ» ٶتە سەتسٸز شىققانىن مويىنداماسقا امال جوق. بۇل – باعىتسىز بيلٸككە دەگەن قارسىلىعى قالىڭداي تٷسكەن, ونسىز دا اشىنعان جۇرتتىڭ جان-ايقايى بولسا كەرەك.

بيلٸكتٸڭ جٷيەسٸز جۇمىسى, جاۋاپكەرشٸلٸكتەن تەرٸس اينالۋى, مەسەلەنٸ دەر كەزٸندە اۋىزدىقتاماۋى – بٸرنەشە قالاداعى بەيبٸت شەرۋگە الىپ كەلدٸ. ەلباسى ٶزٸ توقتاۋ سالىپ, زاڭنىڭ بەتٸن قايتارماعاندا جاعداي ودان سايىن ۋشىعىپ كەتەر مە ەدٸ. بويعا جينالعان بار اشۋ-ىزاسى تٶگٸلە جازداعان كەزدە, موراتوريي تۋرالى جاڭالىق ەستٸلدٸ. قۇددى بٸر جاۋىمىزدى جەر جاستاندىرعانداي بٶركٸمٸزدٸ اسپانعا اتا قۋاندىق. بٸراق بۇل – جەر تۋرالى زاڭنىڭ كٷشٸ بٸرجولا جويىلدى دەگەن سٶز ەمەس.

ٸلە-شالا كوميسسييا قۇرىپ, قايتا تالقىعا سالۋىن – كٶزبوياۋشىلىقتىڭ بٸر كٶرٸنٸسٸ ەمەس پە دەپ كٷمەنداناسىڭ. مەسەلەنٸ سوزباقتاتىپ جٷرٸپ, ٶز پيعىلدارىن ٸسكە اسىرىپ كەتپەسە بولعانى. ەيتەۋٸر, كوميسسييا قۇرامىندا ەلدٸڭ جايىن ويلار بٸراز ازاماتتارىمىز بوي كٶرسەتتٸ. ۇلت مٷددەسٸن, جۇرت تٸلەگٸن جەردە قالدىرماس دەپ سەنەمٸز. ونى جەتٸ ساعاتقا سوزىلعان العاشقى وتىرىستان-اق بايقادىق. كٷللٸ قازاق بار ٷمٸت-تٸلەگٸن سول كٸسٸلەرگە ارتىپ وتىر. سوڭى جاقسى بولسىن دەپ تٸلەيٸك.

شەرحان تالاپ