Týrizm jáne sport vitse-ministri Serik Jarasbaev shahmatshy Bibisara Asaýbaevanyń basqa eldiń azamattyǵyn alýy múmkin degen aqparatty joqqa shyǵardy, dep habarlaidy ult.kz.
Parlamenttiń birlesken otyrysynda jýrnalisterdiń saýalyna jaýap bergen vitse-ministr bul máseleniń kún tártibinde joq ekenin aitty.
«Bibisara Asaýbaevanyń azamattyǵyn ózgertý máselesi múlde kóterilip otyrǵan joq. Bul áńgimeni kimniń jáne ne úshin taratqanyn bilmeimin», – dedi Serik Jarasbaev.
Onyń sózinshe, Bibisara – Qazaqstannyń naǵyz patrioty ári el namysyn halyqaralyq jarystarda abyroimen qorǵap júrgen sportshy.
«Ol Qazaqstan tarihynda shahmattan álem chempionatynyń altyn medalin qatarynan úsh ret jeńip alǵan tuńǵysh sportshy. Sondyqtan biz ony erekshe qurmetteimiz. Buǵan deiin kóterilgen qarjylyq másele tolyqtai sheshildi», – dedi vitse-ministr.
Serik Jarasbaevtyń aitýynsha, jaqyn kúnderi Bibisara Asaýbaeva Astanaǵa kelip, Prezident jarlyǵymen berilgen memlekettik nagradasyn alady.
Eske salaiyq, buǵan deiin Bibisara Asaýbaeva Memleket basshysynan kómek surap, Týrizm jáne sport ministrliginen tiisti qoldaý kórmei otyrǵanyn málimdegen edi. Keiin ministrlik bul málimdemege jaýap berip, shahmat basym sport túrleriniń qataryna kirmeitinin túsindirgen bolatyn.
