Qazaqstandaǵy ózekti máselelerdiń biri – baspana máselesi. Árine, jer basyp júrip, osy eldiń bir azamaty bolǵandyqtan, «qairan meniń óz úiim, keń saraidai boz úiim» dep shalqadan túsip jatar orda bolmasa da, bi túsetin úii bolǵandy kim qalamaidy deisiz. Osyndaida arqalaǵany altyn, jegeni jantaq deitin jýrnalister qaýymyn baspanamen qamtamasyz etý ár tóbeden bir burq etken shań sekildi, ár jiynda bir aitylyp, aitqan jerde qalyp kele jatqan áńgime. Osy máselege qatysty tanymal jýrnalist, Bas redaktorlar klýbynyń prezidenti Bibigúl Jeksenbai pikir bildirdi, dep habarlaidy BAQ.kz tilshisi.
Bibigúl Nurǵaliqyzynyń aitýyna qaraǵanda, BAQ salasynda ter tógip júrgen jandardy baspanamen qamtý sol aqparattyq ortalyqty (gazetti, telearnany, saitty, t.b.) basqaryp otyrǵan adamnyń biliktiligine, óz qol astyndaǵy qyzmetkerleriniń áleýmettik jaǵdaiyna nemquraidy qaramaýyna bailanysty.
«Jaqynda Ulttyq Ekonomika ministriniń jýrnalisterdi baspanamen qamtý máselesi boiynsha «Eger AKM usynys jasap, bizge tapsyrys beretin bolsa, biz bul máseleni sheshýdi qarastyramyz» degen sózin barlyqtaryńyz estigen bolarsyzdar. Endigi kezek jýrnalisterde de, ministrlikterde de emes, ol sol BAQ salasyn basqaryp otyrǵan basshylyqta. Olai deitinimiz, qol astynda jumys isteitin qyzmetkerdiń áleýmettik jaǵdaiyn sol salany basqaryp otyrǵan basshydan artyq eshkim bilmeidi ǵoi. Sondyqtan sapaly, ári jan-jaqty aqparattyq material talap etý úshin óz qaramaǵyndaǵy jýrnalistiń jaǵdaiyna basshylyq alańdaýy kerek. Onyń áleýmettik te, ekonomikalyq ta jaǵdaiyn jasap, kimge ne kerektigin bilip otyrǵan, qyzmetkerine qamqor basshy bolar bolsa, baspana máselesin de bir jolda túbegeili sheship jibermese de, muqtajdaryna páter taýyp berýine múmkindik bar», - deidi Bibigúl Jeksenbai.
Onyń aitýyna qaraǵanda, jýrnalisterdiń de atqaryp júrgen jumystaryna jaýapkershilikpen qarap, arzan dúniege qyzyqpai, saliqaly oi, salmaqty kózqaras tanyta bilgenderi abzal.
«Qazir jýrnalisterdi baiqap otyrsańyz, aýyrdyń ústimen, jeńildiń astymen júrgendi jaqsy kóredi. Kóbi áleýmettik jelilerdegi arzan aqparatqa qushtar. Óndiristik maqalalardy, saiasi saraptamalardy tappaisyz. Tipti ekonomikada taldap jazatyn, meditsinany túbegeili zerttep jazatyn, bolmasa balalar taqyrybyn jerine jetkize zerdelep júrgen jýrnalisti ataý qiyn», - deidi Bas redaktorlar klýbynyń prezidenti.
Erjan Jaýbai
.jpeg)