2022 jylǵy qysqy Paralimpiada oiyndarynda Qazaqstan namysyn kimder qorǵaityny belgili boldy, - dep habarlaidy Tengrinews.kz tilshisi Ulttyq paralimpiada komitetine silteme jasap.
XIII qysqy Paralimpiada oiyndary 4-13 naýryz aralyǵynda ótedi. Oǵan álemniń 50 elinen 700-den asa sportshy qatysady. Ulttyq quramada bes sportshy bar: Aleksandr Gerlits, Erbol Hamitov, Sergei Ýsoltsev, Iýrii Berezin jáne Denis Petrenko. Qazaqstannyń paralimpiadashylary eki sport túrinen óner kórsetedi: shańǵy jarysy jáne parabiatlon.
"Biyl COVID-19 jaǵdaiy qysqy Paralimpiadaǵa sportshylardyń tolyq deńgeide qatysýyna kedergi keltirdi. Litsenziia alýǵa daiyndyq kezinde keibir sportshy biliktilik raýndtarynan óte almady. Bastapqyda kóp sportshy barady dep josparlanǵan bolatyn. Biraq qazir qurama tolyq quramda bara jatqan joq. Bizdiń paralimpiadashylar qysqy oiyndarǵa úlken jumys jasady. Paralimpiadaǵa qatysýdyń ózi - úlken jetistik. Olardyń jeńiske degen umtylysy jáne ózderine degen berik senimi bar", - dedi Ulttyq paralimpiada komitetiniń prezidenti Qairat Boranbaev.
Oiyndardyń ashylý saltanaty 4 naýryzda Nur-Sultan ýaqytymen 22.00-de ótedi. Shańǵy jarysy boiynsha álem kýbogynyń qola júldegeri, halyqaralyq dárejedegi sport sheberi Erbol Hamitov Qazaqstan Paralimpiada quramasynyń týyn ustap shyǵady.
"Qazir shańǵy jarysynan Qazaqstan ulttyq quramasy Almaty oblysynda, olarǵa Paralimpiada aldynda oqý-jattyǵý jiyny ótip jatyr. Bári karantin rejimine sai ótedi. Koronavirýsty taratpaý boiynsha barlyq saqtyq sharasy qarastyryldy. Qysqy oiyndarǵa qaýipsiz jaǵdaida qatysý jáne sportshylarymyzdyń densaýlyǵy - basty nárse. Sportshylardyń jaǵdaiy jaqsy", - dedi shańǵy jarysynan Qazaqstan quramasynyń bas bapkeri Vasilii Kolomiets.
