Qytai astanasynda Qytai Halyq Respýblikasynyń qurylǵanyna 70 jyl tolýyna orai áskeri parad boldy, dep habarlaidy QazAqparat.
Oǵan Qytai halyq azat etý armiiasynyń 15 myń áskeri qyzmetshisi, 580 áskeri tehnika jáne 160 áskeri ushaq qatysty.
Aýqymdy paradty QHR Tóraǵasy Si Tszinpin qabyldady.
Paradta jańa áskeri tehnika úlgileri jurtshylyqqa alǵash ret kórsetildi. Olardyń arasynda qurlyqaralyq «DF-41» ballistikalyq zymyrany, «DF-17» giperdybystyq glaider zymyran tasymaldaǵyshy, H-N6 strategiialyq bombalaǵyshy, dybystan jyldam ushatyn «CJ-100» qanatty zymyrany, soqqy beretin «Lijian» basqarýshysyz ushatyn («stels» tehnologiiasymen ushatyn) ushaǵy, t.b. bar.
Áýede ushqan áskeri ushaqtar, joiǵysh ushaqtar, tikushaqtar, kólik ushaqtary paradqa erekshe kórinis syilady. 1,3 myń áskeri qyzmetshi qatysqan orkestr paradty mýzykamen súiemeldep turdy.
Qytaidyń bitimgerleri de alǵash ret áskeri paradqa qatysty. QHR-nyń bitimgerleri (2,5 myńnan astam) BUU Qaýipsizdik Keńesiniń turaqty músheleri arasynda eń kóbi. Jalpy parad 80 minýtqa sozyldy.
Parad sońynda 100 myńǵa jýyq adamnyń qatysýymen saltanatty shara boldy. Qytai qoǵamynyń barlyq býyndarynan jinalǵan qisapsyz adam Beijińniń basty kóshesi — Chanantsze jáne Tiananmen alańynan júrip ótti.
Memlekettik mereke qurmetine 70 myń kógershin men tústi sharlar ushyryldy.
Odan ári gala-kontsert qoiylyp, otshashý boldy.
Eske salaiyq, búgin Qytaida «Altyn apta» bastalady. Iaǵni aspan asty eliniń turǵyndary 7 qazanǵa deiin demalady.
