Beijiń Olimpiadasynyń aiaqtalýyna sanaýly kúnder qaldy. Bul - Qazaqstan táýelsizdik alǵannan keiin qatysyp jatqan segizinshi qysqy oiyndar. 30 jyl ishinde otandyq sportshylar aq Olimpiadadan segiz ǵana medal alǵan. Olardyń tórteýi ataqty shańǵyshy Vladimir Smirnovqa tiesili. Aty ańyzǵa ainalǵan sportshymyz Beijiń tórinde Qazaqstan sportyndaǵy birqatar máselelerdi kóterip, suqbat berdi, dep habarlaidy Olympic.kz.
- Vladimir Mihailovich, 2022 jylǵy Olimpiadadan alǵan áserińizben bólisińiz. Bul kúnder nesimen este qaldy?
- Eń aldymen, Olimpiada oiyndary óte joǵarǵy deńgeide ótip jatqanyn atap ótkim keledi. Uiymdastyrýshylar tańdaýly sport nysandaryn salǵan. Olardyń barlyǵy halyqaralyq standarttarǵa sáikes keledi. Beijińde alaýy tutanǵan qysqy oiyndar álem jurtshylyǵyn tańǵaldyrǵany ras. Óitkeni eshkim qytailyqtardyń Olimpiadany qalai ótkizetinin bilgen joq. Mine eki aptadan asa ýaqyt ótti, al ózim joǵarǵy baǵaǵa laiyqty dep nyq senimmen aita alamyn.
- Ciz qazaqstandyq atletterdiń Beijińdegi ónerin baqylap júrsiz be? Búgingi kúnge deiingi komandanyń nátijesine qandai baǵa beresiz?
- Árine, bizdiń quramanyń búginge deiin birde-bir medal jeńip almaǵany ókinishti jáne nátijeler azdap qynjyltady. Ekinshi jaǵynan, bul nátijeler kútildi. Oǵan sebep te bar. Óitkeni, short-trek pen mogýldy qospaǵanda, álem kýboktary, aldyńǵy maýsymdaǵy nátijeler kóp júlde utyp almaitynymyzdy meńzegendei. Konki jarysynda da azdaǵan úmit boldy. Al qalǵan sporttaǵy atletterdiń maqsaty - bastysy qatysý. Qazaqstandyq delegatsiia negizgi mindetti oryndady dep oilaimyn. Iaǵni, kóptegen sport túrlerinen joldama utyp aldy.
Atletterimiz jaqsy óner kórsetýde, el namysyn abyroimen qorǵaýda. Múmkindikteri men mádenietimizdi kórsetýde. Ekinshi jaǵynan, jeńis tuǵyrynan ázirge otandastardyń kóterilmegeni ókinishti. Alaida aldaǵy ýaqyttarda Olimpiadada júlde alatyn sportshylar shyǵady dep úmittenemin. Osy turǵyda Qazaqstan daryndy jastardy izdeýge tyrysý kerek. Olar ózdiginen kóterile almaidy emes pe?! Sportqa investitsiia quiý kerek, jańa sport túrlerine kóńil bólgen jón, halyqty kóbirek tartý kerek. Bul shyn talanttar men qyzyǵýshylyǵy bar sportshylardy irikteý úshin óte mańyzdy. Dál osyndai eńbeksiz bizde eshqashan medalǵa úmit bolmaidy. Al bul jumystardy mindetti túrde jasaý kerek.
- Sizdiń oiyńyzsha, bul jumysty neden bastaý kerek?
- Bizde qys mezgili bar. Biraq sportymyzda qurylym (júie) jaqsy jumys istemeidi. Qazaqstanda únemi bir nárse ózgerip otyrady. Sportta jetistikke jetý úshin aldymen jaqsylap taldaý jasaǵan durys. Qai oblysta qandai sport túrlerin damytýǵa bolady degen sekildi. Júieli túrde oryndalatyn jaqsy baǵdarlama qajet. Bunyń barlyǵyn jasaý úshin árine qarjy, jańa sport nysandary kerek jáne jarys kestesin ózgertken durys. Olardy halyqaralyq deńgeide jasaýǵa áreket etken jón. Sebebi, básekelestik az bolǵan jaǵdaida talanttardy tabý qiynǵa soǵady. Básekelestikti únemi arttyryp otyrý kerek. Ol úshin bizge jii sporttyq sharalar ótkizip, sheteldegi básekelerge kóbirek qatysý qajet. Ásirese kórshiles elderge barǵan durys. Qysqy sporty jaqsy damyǵan Reseimen biryńǵai emes, biraq óte jaqyn kúntizbelik jospar jasaýǵa ne kedergi keltiredi. Bul tek negizi quramdy ǵana saiystarǵa jibere berý kerek degen sóz emes. Balalar, jasóspirimderge de jaǵdai jasalǵany jón. Elimizde balalar, jasóspirimder, stýdentter sportyn damytý kerek. Alaida bul úshin jaqsy baǵdarlama kerek ekenin taǵy da qaitalap aitamyn. Bul baǵdarlamany qurastyryp shyǵatyn talantty adamdar tartý kerek jáne ony engizý óte mańyzdy. Bizde bundai múmkindikter bar, biraq úlken sportty damytý siiaqty qarapaiym ideialardy júzege asyra almaitynymyz ókinishti.
- Olimpiadalyq sportta únemi jańa tártipter qosylyp otyrady. Biz genderlik tepe-teńdikti saqtaý men jastardyń sport túrlerine ekpin túskenin kórip otyrmyz. Al siz qysqy Olimpiadadaǵy sport túrleriniń damý tendentsiialary qandai dep oilaisyz?
- Búginde sport birneshe baǵytta damyp keledi. Biz shańǵy, konki, mánerlep syrǵanaý, taý shańǵysy siiaqty dástúrli sport túrlerin saqtaýymyz qajet. Sonymen qatar, jastardyń sportyna múmkindik pen oryn qarastyrýy mańyzdy. Fristail-mogýl jáne akrobatika –sporttyń jańa lebi. Al short-trek jaqynda ǵana biz óner kórsetetin sporttyń arasyna qosyldy. Bizge dástúrli sporttardy saqtap, jańa túrlerine de kóńil bólgen jón. Bul balans eski dástúr men jańa sport túrleriniń arasyndaǵy úilesim bolyp tabylady. Bul árqashan olimpiada qozǵalysyna ilesip otyrýǵa múmkindik bermek.
-Sizdiń oiyńyzsha, ata-analardy qyzyqtyryp, balalardy qysqy sport sektsiialaryna berý úshin ne isteý kerek?
- Ata-analar balalaryn sektsiialarǵa berýden qoryqpaidy. Olar qýana qatystyrady. Men buny problema dep sanamaimyn. Árbir balaǵa qalaǵan sportyna baratyndai múmkindik bergen jón. Tek múmkindigi men qarjysy bar ata-analar ǵana balalaryn sportqa bermeýi kerek. Qarapaiym otbasylarda balalaryn qalaǵan úiirmelerge qatystyra alatyndai jaǵdai qarastyrǵan abzal. Búgingi kúndegi basty máselelrdiń biri - sektsiialardyń aqyly bolýy. Bul jaǵdaida qaltasy qalyń azamattarda ǵana tańdaý bolady. Tájirbiede kórsetkendei, bai januialarda talantty sportshylar óte sirek shyǵady. Daryndylar ata-anasy kúni túni tyńbai eńbek etetin, jalqaýlyqty jat kóretin otbasylardan shyǵady. Sport kóp eńbektenýdi jáne úlken jumysty qajet etedi. Bundai januiadan shyqqan bala qiyndyqtarǵa tótep beredi. Sondyqtan sport mektepteriniń azdyǵy men qoljetimdi bolmaýy elimizde problema bolyp tur.
- Qysqy sportty bizde "jalǵyz adam" jasaidy degen pikir bar. Mundai talanttardy izdeýdi jalǵastyrý kerek pe, álde nazardy buqaraǵa aýdarǵan durys pa?
- Eger qaptyń ishinen "altyn dándi" izdesek, onyń jobamen qaida jatqanyn bilsek, bul jaqsy. Ókinishke qarai, álem bulai jumys istemeidi. Jappai damytýǵa kóńil bóledi. Buqara sportyn damytqan óte mańyzdy. Kópshiliktiń arasynan shyn talanttardy taýyp, solardyń darynyn shyńdai alatyn bilikti bapkerler tartý kerek. Mine osy keregi jáne bul jeke jumys bolyp tabylady. Basynda buqaralyq sportpen jumys istegen óte mańyzdy. Budan basqa jumys kórip turǵanym joq. Jai júrip, "mine, juldyz ósip keledi, Men ony baýlyp, erteń Olimpiada chempionyn jasaimyn" dep oilaý - kózboiaýshylyq. Tipti qorqynyshty. Óitkeni sporttyń ózi Olimpiada júldesimen shektelmeidi. Azdap sport uǵymyn keńeitken abzal. Bizge sport qozǵalý úshin, adamdar sportty jaqsy kórý úshin, jergilikti halyq balalaryn óz erkimen sektsiialardy qatystyrý úshin kerek. Sebebi, sport salaýatty ómir salty, sport – keń uǵym. Bul adamdardyń densaýlyǵy, ekonomikanyń turaqtylyǵy, halyqtyń ál aýqaty, adamdardyń durys oilanýy. Barlyǵyn osydan bastaǵan abzal. Biz buny halyqtyń sanasyna tolyqtai sińdirgen ýaqytta álem chempionatynda, Olimpiada oiyndaryna el namysyn qorǵai alatyn sportshylardy izdei bersek bolady. Olarmen jumysty sol kezde erkin bastai berýge bolady. Al basqa kezeńder túbegeili kerek emes.
- Áńgimeńizge rahmet!
