Búginde Qytaida qysqy aq olimpiada ótip jatyr. Ókinishke qarai, Qazaqstannyń qorjynynda ázirge júlde joq. Osy oraida Qazaqstannyń ulttyq olimpiada komiteti sport direktsiiasynyń direktory Elsiiar Qanaǵatov aitýly júldege qatysty mán-jaidy túsindirip berdi, dep habarlaidy QazAqparat.
«Árine, sportshylarymyzǵa patriottyq sezim týraly únemi aityp otyramyz. Jalpy qysqy sport túrine kelsek, bizde 2 keshen bar. Biri Almatyda, ekinshisi Shýchinskide. Jalpy aitqanda, qysqy sport túri men ár alańnyń ózindik qyr-syry bar. Iaǵni sportshy sol jerge baryp daiyndalmasa bolmaidy. Demek otandyq sportshylar shetelge jii shyǵyp, daiyndalýy tiis», - dedi Elsiiar Qanaǵatov Beijińnen tikelei efirde ótken baspasóz máslihatynda.
Onyń aitýynsha, Beijiń olimpiadasynan keiin ulttyq quramanyń óner kórsetýine qatysty qorytyndy jasalady.
«Qysqy olimpiadaǵa 91 memleket qatysyp otyr. Sonyń ishinde bizdiń memleket aitarlyqtai nátije kórsetýde. Aitar bolsaq, fristaildan qyzdarymyz qandai sekirýler jasady. Ony ózderińiz kórdińizder», - deidi ol.
