QR Aqparat jáne qoǵamdyq damý ministri barlyq jýrnalister men BAQ qyzmetkerlerin kásibi merekesimen quttyqtady, dep habarlaidy "Ult aqparat".
«Kez kelgen qoǵamnyń damýy, memlekettik ósip-órkendeýi – sol qoǵamnyń ishki turaqtylyǵyna, bereke-birligine, ulttyq qundylyqtarynyń saqtalýyna, memlekettik myqty ideologiiasyna bailanysty. Al muny qalyptastyratyn eń birinshi – ǵalymdar men ziialylar, aqyn-jazýshylar men jýrnalister. Jýrnalister – qoǵamnyń janashyry. Qoǵam tirshiligindegi qylt etken qiyndyqtarda birinshi bolyp ún qatatyn, tyǵyryqtan shyǵar jol izdeitin de jýrnalister qaýymy.
Sońǵy ailardaǵy qiyn jaǵdai kezinde óz densaýlyǵy men ómirine qaýipti ekenine qaramastan, adamdarǵa shynaiy aqparat taratyp, adamdardyń erteńgi kúnge degen senimin arttyrý maqsatynda kásibi mindetin adal atqaryp júrgen media qyzmetkerleri jumysyna qoǵam kýá», - dedi Aida Balaeva.
Saltanatty is-shara aiasynda joǵary kásibi sheberligi úshin elimizdiń barlyq aimaqtarynan ondaǵan media qyzmetkerler QR Aqparat jáne qoǵamdyq damý ministrliginiń Qurmet Gramotasymen jáne otandyq jýrnalistikany damytýǵa airyqsha úles qosqan media maitalmandary "Aqparat salasynyń úzdigi" tós belgisimen marapattaldy. Sanitarlyq epidemiologiialyq jaǵdaiǵa bailanysty marapat tek Qazaqstan jáne "Habar 24" telearnalarynyń jýrnalisteri Maqpal Ýkenova men Qanat Bazylhanov, Aiqyn jáne "Kazahstanskaia pravda" gazetteriniń jýrnalisteri Aitjan Murjanov pen Asqar Beisenbaevqa tabystaldy.
Sonymen qatar, biyl alǵash ret belgili jýrnalist jáne qoǵam qairatkeri, QR Prezidenti syilyǵynyń laýreaty Beisen Quranbek atyndaǵy "Jiger" syilyǵy taǵaiyndalǵany belgili. Esterińizge sala keteiik, tórt nominatsiia boiynsha konkýrsqa qatysý úshin ótinimder qabyldaý 2020 jyldyń 26 mamyry men 15 maýsymy aralyǵynda ótken bolatyn. Jeńimpazdarǵa syilyqty "Aqparat salasynyń úzdigi" tósbelgisiniń jańa iegerleri tabystaý qurmetine ie bolady.
"Jiger" syilyǵynyń Merei Shohmanova ("Habar 24" TK, "áleýmettik taqyryptaǵy úzdik TV siýjeti" atalymynda), Azamat Qasym ("Egemen Qazaqstan" gazeti, «áleýmettik taqyryptaǵy úzdik maqala»), Aqjeleń Rahatdinqyzy ("Almaty" TK, "áleýmettik taqyrypta eń úzdik jariialanym (áleýmettik jelide),Olga Býgaeva, (AA "Pavlodarnews.kz", "áleýmettik taqyryptaǵy úzdik fotosýret" atalymynda) alǵashqy iegerleri atandy.
Saltanatty shara kezinde áriptesterin beinebailanys arqyly sheteldik bólimshelerde jumys isteitin otandyq BAQ jýrnalisteri, atap aitqanda, Maira Kabieva (AQSh), Sergei Aisender (Izrail), Iýliia Týjilkina (Grýziia), sondai-aq Janat Ernst (Belgiia) jáne Ǵalymjan Qaramanuly (Ulybritaniia) quttyqtady.
Jiyn barysynda is-sharaǵa qatysýshylar 2020 jyl qazaqstandyq jýrnalister úshin tek koronavirýs pandemiiasymen kúrespen ǵana emes, sonymen qatar júzdegen naǵyz kásibi sheberlerdiń adal eńbegi men mańdai teriniń arqasynda jetken jetistiktermen de este qalatynyn atap ótti. Sondai-aq, biylǵy jyly respýblikalyq «Kazahstanskaia pravda» gazeti men «Kazinform» halyqaralyq aqparat agenttigi 100 jyldyq mereitoiyn atap ótýde, «Habar Agenttigi» AQ-nyń media naryqqa shyqqanyna 25 jyl tolyp otyr.
Aqparat jáne qoǵamdyq damý ministri Aida Balaeva jýrnalist mamandyǵyn tek boiynda airyqsha azamattyq ustanymy, keń dúnietanymy men joǵary adamgershilik qundylyqtary bar adamdar ǵana alyp júretinin atap ótip, barlyq BAQ qaýymdastyǵy ókilderine alǵysyn bildirdi. Merekelik sharada jýrnalister kúnine arnaiy jazylǵan ánniń tusaýy da kesildi.
«Ózimniń jáne ministrlik ujymymnyń atynan barsha áriptesterimizdi shyn júrekten quttyqtaimyn. Rasynda da jýrnalistika shyǵarmashylyq óristi ǵana emes, kásibi órshildik pen asa tereń mádeniettilikti, jan-jaqty bilimdilik pen ishki tárbielikti qatar talap etetin mamandyq. Óitkeni, ǵulama ǵalymmen de, birtaýar darynmen de, qarapaiym qaýymmen de teń sóilesip, tamyryn tabý ekiniń birine buiyra bermeitin dara qasiet, asqaq abyroi. Óz basym osyndai qasiet pen abyroidy otandyq jýrnalistikamyzdy búgingidei tamasha biikke kótergen maitalman aǵa býynnan bastap, osy kúni aqparat aǵymymen alysqan árbir tilshiniń boiynan kóremin. Kórip qana qoimai, sizderdiń bar erekshe talǵampazdyqtaryńyzdy sezinemin. Sondyqtan osyndai talǵamdy qoǵamda qalyptastyryp, ainalamyzǵa adal aqparat jetkizýge atsalysqan, aýyr da abyroily eńbekterińiz úshin alǵysymdy jetkizemin», - dedi ministr.
