Aqtóbedegi jaǵdai qatty alańdatyp otyr. Qaiyrymdy jandar qoldan kelgen kómekti kórsetip jatyr. Ótken jyly Qaraǵandy oblysyna kiim-keshek, azyq-túlik tiegen eki Kamaz jibergen Jetisýlyq azamattar da bul joly bei-jai qarap otyrǵan joq. Kóp bolyp kómektesermiz-aý. Biraq, jylda sýdyń astynda qala beremiz be? Onyń aldyn alýǵa bolmai ma? degen suraq kóptiń kókeiinde turǵany anyq.
Árine, tabiǵattyń alapat kúshine eshkim qarsy tura almasy belgili. Alaida, sońǵy jyldardaǵy sý tasqyndarynyń arnasynan asyp, turǵyn úilerdi basyp qalǵanyna jergilikti atqarýshy biliktiń beiǵamdyǵy sebepker ekenin mamandar jaqsy biledi. Ákimqaralardyń júieli jumys istemeýi, aldyn-ala josparlamaýy, qaýipti bile tura qam jasamaýy, bolashaqty baǵdarlamai búgingi kúnniń máselelerimen ǵana bas qatyrýy – osyndai jaǵdailarǵa ákelip otyr. Jáne ol bolashaqta qaitalana beredi.
Men qyzmet barysyna orai apta saiyn oblys ákiminiń jinalysyna qatysamyn. Shyny kerek, basynda unamaityn. Óitkeni, Batalov eshkimdi aiamaidy. Betiń bar, júziń bar, basyń bar, jasyń bar demeidi. Jumysyna salǵyrt qaraǵannyń bárin jurttyń aldynda soiyp salady. Jazyqty bolǵandyqtan bastary salbyrap, unjyrǵylary túsip turǵan el aǵalaryn kórip keide aiap ketesiń. Birde ózine aittym da: elge nege ursa beresiz? - dep.
-Ái, Beisen! Sen ne bilesiń? Talap etpeseń jumys qalai júredi? El bárin bilip, kórip otyr. Elbasy bizge senip otyr. Biz sony aqtamasaq pozor emes pe?! Sosyn, aitshy, kimge kinásiz, jazyqsyz urystym? Men olardy jumystan ketireiin demeimin. Shirasyn deimin. Bilmese - úirensin, el aldyndaǵy jaýapkershiligin sezinsin deimin - dep ózime shuqshiia qarady. Ákimniń ádildigin moiyndamasqa amal joq. Jumysyńdy jaqsy atqardyń ba, senen jaqsy adam joq. Arqańnan qaǵady, ataǵyn alyp beredi, jaǵdaiyńdy jasaidy. Durys istemeisiń be, onda - DO SVIDANIIa!
Ákimimdi maqtaiyn dep turǵam joq. Ol kisi meniń maqtaýyma muqtaj da emes. Qos ózenniń ortasynda turatyn taldyqorǵandyqtar kóktemde tynysh uiyqtasa ol – atqarýshy biliktiń aldyn-ala josparlap, arnalardy ashyp, qaptalyn bekitip saqadai-sai turýynyń arqasy ekenin kóre tura aitpasqa bolmaidy. Týra qalanyń irgesinde aǵyp jatqan «kúndiz kúmis, túnde altyn» dep áspetteitin Qaratalymyz 4-5 jyl buryn asaý minez tanytyp, irgesindegi Erkin aýyly men Rezidentsiiany basyp ketetindei qaharlanǵan. Sonda marqum Sáken Jylqaidarov bastaǵan qala basshylarynyń túnimen arpalysyp, sýdyń betin qaitarǵanyna, ony jurttyń sezbei qalǵanyna da kýá bolǵan edim.
Osy Qaratal ózeni burynda kóktemde tómendegi aýyldardy basyp, jaiylyp ketetin. Soǵan eki jyl buryn arnaiy aýyr tehnikalar aldyryp, bálenbai shaqyrym tereń kanaldar qazyp, sý búginde emin-erkin Balqashqa quiylyp jatyr. «Bir oqpen eki qoiandy aldy» degen osy. Birinshiden, kóktemde aýyl turǵyndary tynysh uiyqtaidy. Ekinshiden, Balqashtyń kóli tolyp keledi. Úshinshiden, osy kanaldardyń arqasynda bizdiń jigitter alysqa barmai Taldyqorǵannyń irgesinen balyq aýlaityn kúnge jetti.
«Júieli, josparly jumys isteýdi Batalovtan úirensin» desem basqa ákimder renjip júrer. Biraq, tabiǵatqa jaba bermei, apattyń aldyn alýdy qarastyrsa degen oi ǵoi bizdiki.
P.S. Jazarymdy jazyp aldym da bárin kórgen, bárin biletin Berdibek Saparbaev aǵam nege qamsyz qaldy eken? dep oilanyp otyrǵan...
Beisen Qurmanbektiń feisbýktaǵy jazbasynan
