Álem elderiniń, halyqaralyq uiymdardyń basshylary men premer-ministrleri 4 tamyzda Livannyń áskeri-teńiz kúshteri (ÁTK) bazasyna jaqyn Beirýt porty aýdanynda bolǵan jarylysqa bailanysty Livan halqyna kóńil aityp, shuǵyl kómek kórsetýge daiyn ekenderin bildirdi, dep habarlaidy Taiaý Shyǵystaǵy arab buqaralyq aqparat quraldary.
5 tamyz kúni Beirýt ýaqytymen saǵat 00:30-da Livannyń Densaýlyq saqtaý ministri Muhammed Hasan jarylystan qaza tapqandar sany 70-ke jetkenin, 4 myńǵa jýyq turǵyn jaraqat alǵanyn habarlady. Qutqarý jumystary áli de jalǵasýda.
Aq úi AQSh-tyń Beirýttaǵy jarylysty muqiiat qadaǵalap otyrǵanyn aitty. AQSh Memlekettik departamentiniń ókili Qurama Shtattardyń Beirýttaǵy jarylys týraly habarlamalardy muqiiat baqylap otyrǵanyn jáne «qoldan kelgen barlyq kómekti» kórsetýge daiyn ekenin málimdedi. AQSh memlekettik departamentinde jarylystyń sebepteri týraly aqparat joq jáne zardap shekkenderdiń arasynda amerikalyqtardyń bar-joǵyn anyqtaý úshin jergilikti bilikpen jumys júrgizilýde.
Katar ámiri sheih Tamim bin Hamad ál-Tani Livan prezidenti Mishel Aýnǵa qońyraý shalyp, dereý Livanǵa jedel qurylatyn aýrýhanalardy jiberýdi buiyrdy.
«Livandaǵy jarylys óte úlken alańdaýshylyq týdyrdy, bizde ne bolǵany týraly jáne onyń sebebi nede ekeni, ol kezdeisoqtyq pa, álde adamnyń jasaǵan áreketi me, eshqandai aqparat joq. Sondyqtan olarǵa jaýap berý úshin bizge bul aqparat qajet», - BUU Bas hatshysy resmi ókiliniń orynbasary Farhan Hak.
Frantsiianyń syrtqy ister ministri Jan-Iv Le Drian Frantsiia Livandy jáne livandyqtardy árqashan da qoldaitynyn málimdedi. «Frantsiia Livan biliginiń qajetine qarai kómek kórsetýge daiyn», - dep jazdy Le Drian Twitter paraqshasynda.
Túrkiianyń prezidenti Rejep Erdoǵan óz eliniń Livanǵa tolyqtai qoldaý bildiretinin jáne osy qiyn jaǵdaida Livan halqyna qajetti kómek kórsetýge daiyn ekenin málimdedi. Túrkiia men Irannyń syrtqy ister ministrlikteri jarylys saldarynan qaza tapqandar men zardap shekkenderdiń kóptigine bailanysty Livan halqyna qaiǵyryp kóńil aityp, jaralanǵandardyń tezirek saýyǵyp ketýin tiledi.
Kreml málimdemesinde prezident Vladimir Pýtin Mishel Aýnǵa kóńil aitý jedelhatyn joldady. Onda Livandaǵy jarylystyń zardaptaryn joiýǵa Máskeýdiń qoldaý kórsetýge daiyn ekenin basa aitty.
Ulybritaniianyń premer-ministri Boris Djonson da Ulybritaniia Livanǵa kez-kelgen jolmen qoldaý kórsetýge daiyn ekenin málimdedi jáne zardap shekkenderge kóńil aitty.
Eýroodaqtyń Syrtqy ister jáne qaýipsizdik saiasaty jónindegi Joǵarǵy ókili Jozep Borrell Livan biligi men halqyna kóńil aitty.
Iordaniianyń Syrtqy ister ministri Aiman Safadi onyń eli Beirýt portyndaǵy jarylystan keiin Livanǵa qajet kez-kelgen kómekti kórsetýge daiyn ekenin málimdedi.
Irak Premer-ministri Mustafa ál-Kazemi Irak úkimeti men halqynyń Livanmen birge ekenin, Iraktyń Livan halqyn qazirgi qiyn jaǵdaida qoldaýǵa daiyn ekenin basa aitty.
Eske sala keteiik, 4 tamyzda Livannyń áskeri-teńiz kúshteri (ÁTK) bazasyna jaqyn Beirýt porty aýdanynda joiqyn jarylys bolǵan edi.
Qazaqstannyń SIM Livandaǵy jarylys saldarynan Qazaqstannyń diplomatiialyq missiiasy ǵimaratyna ziian kelgenin habarlaǵan bolatyn.
