Beibitshilik salasyndaǵy Nobel syilyǵy belarýs quqyq qorǵaýshysy Ales Beliatskiige, Reseidiń "Memorial" jáne Ýkrainanyń "Azamattyq erkindik ortalyǵy" quqyq qorǵaý uiymdaryna berildi, - dep habarlaidy "Ult aqparat".
"Beibitshilik syilyǵynyń laýreattary - óz elderindegi azamattyq qoǵam ókilderi. Olar uzaq jyldar boiy bilikti synaý quqyǵyna dem berip, azamattardyń negizgi quqyqtaryn qorǵady. Áskeri qylmystar men adam quqyǵyn taptaý jáne bilikti asyra paidalaný jaittaryn qujatqa túsirýge kóp kúsh saldy. Olar birigip azamattyq qoǵamnyń beibitshilik pen demokratiia úshin mańyzdylyǵyn kórsetedi" dep málimdedi norvegiialyq Nobel komiteti.
Byltyr reseilik "Novaia gazeta" bas redaktory Dmitrii Mýratov pen filippindik jýrnalist Mariia Ressa osy syilyqtyń laýreaty atanǵan.
Mýratov qarjylai syiaqynyń bir bóligin – shamamen 40,2 mln rýbldi reseilik qaiyrymdylyq qorlaryna, bir bóligin Reseidegi jýrnalisterdiń jaǵdaiy týraly derekti film túsirýge jumsaǵan. Buǵan qosa "Novaia gazeta" qyzmetkerlerine syiaqy retinde de úlestirgen. Jýrnalist biyl maýsymda Nobel medalin AQSh aýktsionynda 103,5 mln dollarǵa satqan, qarjyny Resei basqynshylyǵynan qashqan ýkrainalyq balalar men olardyń otbasyna kómek retinde jiberýge ýáde bergen.
Beibitshilik syilyǵy Alfred Nobeldiń ósietine sáikes, "úlken jetistikke jetken nemese halyqtardy biriktirýde jáne armiialar sanyn azaitýda, sondai-aq beibitshilik kongresterin ótkizýde jáne olarǵa nazar aýdarýda basqalarǵa qaraǵanda kóbirek qyzmet etken adamǵa" beriledi.
Biyl laýreat óziniń jeke beinesi bar medal, diplom jáne 10 million shved krony kóleminde aqshalai syiaqy alady.
2022 jyly beibitshilik syilyǵyna 251 jeke tulǵa men 92 uiym ótinish bergen, jalpy sany - 343 úmitker. Rekord 2016 jyly 376 úmitker bolǵan kezde tirkelgen edi. Biylǵy kórsetkish ekinshi orynda tur.
Aita keteiik, Nobel syilyǵy alǵash ret 1901 jyly tabystalǵan. 120 jyl ishinde syilyq 109 adam men 25 uiymǵa tabystaldy. Laýreattar arasynda 18 áiel bar, eń jasy – 2014 jyly laýreat atanǵan 17 jastaǵy pákistandyq Malala Iýsýfzai. Al, Halyqaralyq Qyzyl krest uiymy Nobeldiń Beibitshilik syilyǵyn úsh ret ielengen.
