Parlament Májilisiniń jalpy otyrysynda «QR Úkimeti men RF Úkimeti arasyndaǵy «Mineraldyq tyńaitqyshtar shyǵarý zaýytyn salý jáne paidalaný» jobasyn iske asyrý týraly kelisimdi ratifikatsiialaý týraly» zań jobasy maquldandy, dep habarlaidy QazAqparat.
Osy Kelisim 2019 jylǵy 3 sáýirdegi QR Indýstriia jáne infraqurylymdyq damý ministrligi men RF Ónerkásip jáne saýda ministrligi arasyndaǵy óndiristik kooperatsiia salasyndaǵy birlesken is-qimyl baǵdarlamasyn iske asyrý aiasynda ázirlendi jáne qol qoiyldy.
«Kelisim Jambyl oblysynda fosfat shikizatty óndirýden bastap eksportqa baǵdarlanǵan ónim - mineraldyq tyńaitqyshtar men ilespe indýstriialyq ónimder shyǵarýǵa deiingi tolyq óndiristik tsikli bar innovatsiialyq himiialyq keshenniń qurylysy men paidalanylýyn qamtamasyz etetin qajetti investitsiialyq jáne normativtik-quqyqtyq jaǵdailar jasaýdy kózdeidi. Jobany EuroShem Group transulttyq kompaniiasynyń enshiles kásiporny - Reseidiń «EvroHim» kompaniiasy iske asyrady. Jobany iske asyrý eki kezeńde júzege asyrylady», - dedi QR Indýstriia jáne infraqurylymdyq damý ministri Beibit Atamqulov.
Birinshi kezeń aiaqtaldy. Taý-ken kesheni paidalanýǵa berildi. Onyń bazasynda:
- jylyna 660 myń tonnaǵa deiin fosforit óndirý jolǵa qoiyldy;
- qýaty jylyna 640 myń tonna ortasha usaqtaý jáne usaq untaqtaý toraby salyndy;
- investitsiia somasy 126 mln AQSh dollaryn qurady;
Qazirgi tańda 550 jańa jumys orny ashyldy.
«Ekinshi kezeń óndiris qýaty jylyna keminde 1 mln tonna bolatyn mineraldy tyńaitqyshtar men indýstriialyq ónimder óndirý jónindegi innovatsiialyq himiialyq keshen salýdy qamtidy.
Qazirgi ýaqytta Qazaqstandaǵy Eýrohim kompaniialar toby II kezeńdi ozyq qarjylandyrý aiasynda 138,7 mln AQSh dollaryn investitsiialady», - dedi ministr.
Onyń aitýynsha, kelisim korporativtik tabys salyǵynan, qosylǵan qun salyǵynan, múlik jáne jer salyǵynan bosatýdy qarastyrady.
Ministr jobany iske asyrý mynadai nátijelerge qol jetkizýge múmkindik beretinin aitty:
- 1 mlrd AQSh dollarynan kem emes tikelei sheteldik investitsiialar tartý;
- jańa jumys oryndaryn qurý, onyń ishinde qurylys kezinde - eki myńǵa deiin jańa jumys oryndaryn, paidalaný kezinde keminde 1 200 jańa jumys ornyn qurý;
- eldiń jalpy ishki ónimin bes jyl ishinde shamamen 2,2 mlrd AQSh dollaryna arttyrý;
- eksport jáne eksporttyq túsim kólemin ulǵaitý;
- memlekettik biýdjetke salyq túsimderin 200 mlrd teńgege ulǵaitý;
- innovatsiialyq qaldyqsyz tehnologiia boiynsha qýaty bar mineraldyq tyńaitqyshtar men indýstriialyq ónimder óndirýdi uiymdastyrý;
- Jańatas jáne Qarataý monoqalalarynyń jedel damýyna yqpal etý;
- mineraldy tyńaitqyshtardyń importyn almastyrýdy qamtamasyz etý.
