Búgin Syrtqy ister ministri Beibit Atamqulovtyń Qazaqstandaǵy Birikken Arab Ámirlikteri, Iordaniia, Irak, Katar, Kýveit, Livan, Liviia, Marokko, Oman, Palestina, Saýd Arabiiasy diplomatiialyq ókildikteriniń basshylarymen jumys kezdesýi ótti, dep habarlaidy "Ult aqparat".
Elshiler sheteldik investitsiialardy tartý jáne shetelge qazaqstandyq eksportty jyljytý salasynda Syrtqy ister ministrliginiń jańa ókilettikterimen tanysty. Óz kezeginde, B.Atamqulov Qazaqstannyń saýda-ekonomikalyq qatynastardy damytýǵa, sondai-aq energetika, logistika, aýyl sharýashylyǵy jáne basqa da salalarda birlesken investitsiialyq jobalardy júzege asyrýǵa múddeliligin atap ótti. "Prezident Nursultan Nazarbaev arab álemimen jan-jaqty jáne ózara tiimdi yntymaqtastyqty nyǵaitýǵa airyqsha mańyz beredi", dedi ministr óz sózinde.
Jiyn barysynda osy ýaqytqa deiin arab elderiniń kópshiligimen saýda-ekonomikalyq jáne investitsiialyq salalarda ózara is-qimyldyń zor áleýeti áli kúnge deiin tolyǵymen paidalanylmaǵany da aityldy.
Ministr 2018 jyly Qazaqstannyń barlyq 22 arab elimen jiyntyq taýar ainalymynyń kólemi 1 mlrd AQSh dollardan aspaǵanyna, al investitsiialardyń jalpy kólemi búginde ne bári 2,4 mlrd AQSh dollar bolǵanyna nazar aýdardy. Sonymen birge qazirgi ýaqytta somasy 9 mlrd AQSh dollary bolatyn birlesken jobalar pystyqtalyp jatqanyn tilge tiek etti.
Saýda-ekonomikalyq yntymaqtastyqty jandandyrý maqsatynda kólik jáne logistika salasyndaǵy problemalardy sheshýge, vizalyq rejimdi jeńildetý arqyly týristik áleýetti damytý qajettigine erekshe nazar aýdaryldy.
Osyǵan bailanysty, qazaqstandyq SIM basshysy arab áriptesterin ekijaqty yntymaqtastyqtyń barlyq baǵyttary boiynsha belsendi is-qimylǵa shaqyrdy.
Sonymen qatar B.Atamqulov ústimizdegi jyldyń 1-2 naýryzynda Abý-Dabi qalasynda ótetin Islam yntymaqtastyǵy uiymy (IYU) Syrtqy ister ministrleri Keńesiniń 46-shy otyrysynyń jumysyna qatysatyndyǵyn rastady. Ol kún tártibinde bizdiń elderimizge qatysty máselelerdiń keń aýqymyn engizilgenin atap ótti. SIM basshysy osy is-shara aiasynda IYU-ǵa múshe elder syrtqy ister vedomstvolarynyń basshylarymen, sonyń ishinde arab ministrlerimen kezdesetinin jetkizdi.
