Foto: mk-kz.kz
Almatyda ótken halyqaralyq BeWoman Asia 2025 forýmynda reseilik psiholog Aleksei Sitnikov Vladimir Pýtindi «passionar tulǵanyń» úlgisi retinde atap ótti. Onyń aitýynsha, Resei prezidenti álemdik qysym men soǵys jaǵdaiyna qaramastan «jeńip kele jatqan» kóshbasshy retinde erekshelenedi eken.
«Qarańyzdarshy, Pýtin soqqyny qalai qabyldaidy?! 55 memleket onymen soǵysyp jatyr, al ol jeńip keledi. Tramptyń ony ushaq baspaldaǵynda qalai qarsy alǵanyn kórdińizder me? Ol eshkimdi bulai qarsy almaidy. Demek, passionarlyq tek ultqa ǵana emes, tulǵaǵa da tán qasiet, ári ol álemdi ózgertetin kúshke ainala alady», — dedi Sitnikov sahnadan sóilegen sózinde.
Bul málimdeme áleýmettik jelilerde úlken rezonans týdyrdy, dep jazady Ult.kz tilshisi.
Shoý artyndaǵy daý
Forýmǵa qatysty byltyr birqatar daý shyqqan. Vizajister men hair-stilisterge «juldyzdarmen jumys isteý múmkindigi úshin tegin qyzmet kórsetý» usynylǵan. Bul usynysty uiymdastyrýshylar emes, deldal kompaniia atynan Robert Aldiiarov taratqan.
Iýliia esimdi stilist bul usynysty synǵa alyp, «Ádemi shoý artynda aqysyz eńbek jatyr» dep jazdy. Osy oqiǵa forýmnyń basty ideiasyna – áiel eńbegin dáripteý ustanymyna kóleńke túsirdi. Bul oqiǵa BeWoman imidjine alǵashqy kúmán uialatty. Áiel eńbegin dáripteýdi maqsat etken forým nege áiel eńbegin baǵalamady? Belgisiz.
Byltyr taǵy bir oǵash jaǵdai boldy: ózin Prezident ákimshiliginiń ókili retinde tanystyrǵan Arnur Apseitov Janna Kanǵa «Adal eńbek úshin» medalin tabys etti. Keiin onyń bul marapaty jalǵan ekeni anyqtalyp, sot sheshimimen jaza taǵaiyndaldy.
Janna Kan: «Mundai marapat bar ekenin de bilmeppin», – dep túsinikteme berdi.
Qoǵam pikiri: missiia ma, marketing pe?
BeWoman forýmy týraly pikir ekiushty. Biri – ony áiel áleýetin ashatyn shabyt alańy dese, ekinshisi – sán men piarǵa qurylǵan shoý retinde kóredi.
YouTube-ta jariialanǵan «BeWoman nemese BeJanna?» atty beinematerialda avtor bul sharany «jeke brendti jyljytý quraly» dep sipattaidy.
Áleýmettik jelilerde jii aitylǵan syndar: qoǵamdyq missiia emes, imidjdik PR aktsiia, shynaiy áiel problemalarynan alshaq glamour-shoý, qymbat bilet – az mazmun.
Dosym Sátpaev: «Keibir elita áli de óz dekolonizatsiiasyn ótkermegen»
Belgili saiasattanýshy Dosym Sátpaev áleýmettik jelige búgin jariialaǵan jazbasynda elde ótetin forýmdar tóńiregindegi daýdy keń kontekste qarastyryp, Qazaqstandaǵy keibir mádeni jobalardyń ideologiialyq baǵytyna syn aitty.
Onyń aitýynsha, sońǵy jyldary elde Reseilik infosyǵandar, pop-mádeniet ókilderi men psevdo-jýrnalisterdi shaqyrý úrdisi jiilegen.
«Keibir adamdardyń aqshasy bar bolǵan soń, Reseiden túrli infosyǵandar men komikterdi shaqyrýǵa degen “qushtarlyǵy” alańdatady. Olardyń kópshiligi áldeqashan zombojúieniń bóligine ainalǵan», — deidi saiasattanýshy.
Sátpaev muny sananyń otarsyzdanbaýymen bailanystyrady:
«Keńes Odaǵy ydyraǵaly 30 jyldan assa da, keibir elitalyq toptar áli de ótkenniń kóleńkesinde ómir súrip jatyr», — dep jazady ol.
Saiasattanýshynyń pikirinshe, eger forýmdar shyn máninde ziiatkerlik alań bolǵysy kelse, kórshi eldiń nasihatshylaryn emes, naqty oi ielerin shaqyrýy qajet.
«Memleket qarjysyn úgitshilerge emes, naǵyz oi óndirýshilerge jumsaý kerek. Óitkeni kórshi eldiń nasihatshylaryn jóni túzý qoǵam áldeqashan qabyldamai qoiǵan», — deidi ol.
Sońǵy jyldary Qazaqstanda áiel kóshbasshylyǵy men genderlik teńdik taqyryby qoǵam nazarynda jii qozǵala bastady. Áleýmettik jelilerde, saiasatta, bizneste áieldiń rólin kúsheitýge baǵyttalǵan jobalar men forýmdar kóbeidi. Solardyń ishinde eń kóp talqylanǵany – Almatyda ótken BeWoman forýmy.
Almatydaǵy Respýblika saraiynda halyqaralyq BeWOMAN Asia 2025 forýmyna álemniń túkpir-túkpirinen kelgen spikerler qatysyp, tehnologiia, biznes, ekologiia, psihologiia, ekonomika jáne saiasat salalaryndaǵy tájiribelerimen bólisti. Forým spikerleriniń qatarynda tanymal jýrnalist Vladimir Pozner, biznes-trener Irina Hakamada, telejúrgizýshi Dinara Sátjan jáne motivatsiialyq spiker Braian Treisi bar.
Jalpy, is-sharaǵa 20 elden 100-den astam sarapshy qatysyp, óz salalaryndaǵy ózekti taqyryptar boiynsha baiandama jasady.
Aqbota Musabekqyzy
