Búginde ekstremizm úshin ShYU elderi aýmaǵynda Qazaqstan izdeý salǵan adamdar joq. Bul týraly Parlament Senatynda QR Ulttyq qaýipsizdik komiteti tóraǵasynyń orynbasary Nurǵali Bilisbekov málim etti, dep habarlaidy QazAqparat.
«Búginde ekstremizm boiynsha ShYU elderi aýmaǵynda bizdiń tarapymyzdan izdestirýde júrgen adamdar joq. Alaida sońǵy bes jylda ShYU elderi aýmaǵynda Qazaqstannyń 30 azamaty izdestirilip, elge qaitaryldy, qylmystyq jaýapkershilikke tartyldy. Olar negizinen Qyrǵyzstannan, iaǵni 25-ke jýyq adam, sondai-aq Resei men Tájikstanda da izdestirildi», - dedi Nurǵali Bilisbekov senator saýalyna jaýap bere otyryp.
Onyń sózine qaraǵanda, sońǵy bes jylda 200-den astam adam Qazaqstan aýmaǵynda izdestirilgen ári ustalǵan. Keiinnen olar ShYU elderi quzyretti organdaryna tapsyryldy.
Budan bólek Bilisbekov ShYU aiasynda lańkestik nemese ekstremistik áreketterge qatysty adamdardyń biryńǵai tizbesi júrgiziletinin jetkizdi.
«Ondai adamdardyń jalpy sany 7 myńnan astam. Olardyń ishinde 700-ge jýyǵy Qazaqstan azamaty. Olar negizinen qaqtyǵys aimaqtaryna barǵandar, iaǵni Taiaý Shyǵysqa shyqqandar», - dedi UQK ókili.
Budan buryn habarlanǵandai, Ulttyq qaýipsizdik komiteti «Jýsan» gýmanitarlyq operatsiiasynyń tórt kezeńin qorytyndylady.
«2019 jyly QR Ulttyq qaýipsizdik komitetiniń úilestirýimen Siriiadan 595 Qazaqstan azamaty qaitaryldy. Operatsiianyń birinshi kezeńinde 47 adam, onyń ishinde 6 er adam, 11 áiel jáne 30 bala, ekinshi kezeńinde 231 adam, onyń ishinde 16 er adam, 59 áiel jáne 156 bala (18 jetim), úshinshi kezeńinde 246 adam, onyń ishinde 8 er adam, 67 áiel jáne 171 bala (9 jetim), tórtinshi kezeńinde 71 adam, onyń ishinde 3 er adam, 19 áiel jáne 49 bala (5 jetim) elge jetkizildi. Osylaisha, jalpy Siriiadan qaitarylǵandar sany – 595 azamat (33 er adam, 156 áiel, 406 bala (32 jetim)», - dep habarlandy UQK Youtube paraqshasynan.
Aita keteiik, búgin Parlament Senatynyń jalpy otyrysynda «Shanhai yntymaqtastyq uiymynyń ekstremizmge qarsy is-qimyl jónindegi konventsiiasyn ratifikatsiialaý týraly» Zańy qabyldandy .
