Búgin elordada Eýraziialyq Berlin klýbynyń 26-shy otyrysy ótti. Onda Germaniia Federativtik Respýblikasynyń 50-den astam kompaniiasy men bank basshylary, startaperlerge “Astana” halyqaralyq qarjy ortalyǵynyń (AHQO) múmkindikteri tanystyryldy.
Sondai-aq, Qazaqstan jáne Almaniia eli arasyndaǵy saýda-sattyq qarym-qatynastardyń nátijeleri sóz etildi.
Astana ekonomikalyq forýmy (AEF) aiasynda ótip jatqan “Aimaq úshin AHQO múmkindikteri men praktikalyq mańyzy” atty klýb otyrysyna Qazaqstan tarapynan AHQO Basqarýshysy Qairat Kelimbetov, GFR-daǵy QR Elshisi Bolat Núsipov, «Kazakh Invest» UK AQ basshylyǵy, sondai-aq QR ekonomikalyq, kommertsiialyq jáne qarjy institýttarynyń ókilderi qatysty. Al, nemis tarapynan basqosýda German ekonomikasy Shyǵys komitetiniń (GEShK) basqarýshy direktory Mihael Harms, «Báiterek» UBH táýelsiz direktory Klaýs Mangold, GFR-nyń QR-daǵy Elshisi Tilo Klinner jáne t.b. boi kórsetti.
Óz kezeginde, Eýraziialyq Berlin klýby ókilderi atalmysh basqosýdyń AHQO alańynda ótkenine qýanyshty ekendigin jetkizdi. “Búgin Qazaqstan men Germaniia taraby dál osy AHQO-da bas qosyp otyrǵanyna qýanyshtymyn. Men byltyr AHQO-nyń ashylý saltanatyn kórý mártebesi buiyrǵan meiman edim. Ortalyq búginde qarqyndy damyp, álemdik qarjy ortalyqtary arasynda óz ornyn tabýǵa barynsha kúsh jumyldyryp jatqanyn kórip otyrmyz. Nemis ekonomikasy damyǵan elderdiń qataryna jatqyzylǵanymen, bizde shikizattyq ekonomika bir jolǵa qoiylmaǵan. Ózderińiz bilesizder, Germaniiada elektrotehnika, mashina qurylysy salasy damyǵan. Sondyqtan Qazaqstan ekonomikany ártaraptandyrý maqsatynda, Germaniianyń tájiribesine súiene alady. Al, AHQO qazaq eliniń ekonomikasyn shikizattyq emes, kerisinshe, ártaraptandyrylǵan ekonomikaǵa ainaldyrýyna óz úlesin qosady degen senimdemin”, - dedi Germaniia eliniń ókilderi.
Óz kezeginde Qazaqstan tarapynan GFR-daǵy QR Elshisi Bolat Núsipov men AHQO Basqarýshysy Qairat Kelimbetov sóz aldy. AHQO Basqarýshysy Qairat Kelimbetov germaniialyq meimandarǵa AHQO múmkindikterin tanystyrsa, GFR-daǵy QR Elshisi Bolat Núsipov táýelsizdik jyldary eki el arasyndaǵy taýar-saýda ainalymy kórsetkishterine toqtalyp ótti.
“Qazaqstanda búginde nemis kompaniialarynyń qatysýymen 900-den astam kásiporyn jumys jasaýda. Sońǵy 12 jylda Germaniiadan Qazaqstanǵa tartylǵan investitsiia kólemi 8,6 mlrd AQSh dollaryn quraǵan. Qazaqstan qaita óńdeý óndirisine qashan da qyzyǵýshylyq tanytyp keledi. Eki el osy baǵyttaǵy jumysyn odan ary jalǵastyratynyna senimdimiz”, - dedi GFR-daǵy QR Elshisi.
Jalpy birlesken basqosý AHQO, GFR-daǵy QR Elshiligi jáne German ekonomikasynyń Shyǵys komiteti uiymdastyrýymen ótti.
