Memleket basshysy Qasym-Jomart Toqaevtyń "daýly jarlyǵyna" bailanysty ekinshi ret túsinikteme bergen Qazaqstan Prezidentiniń baspasóz hatshysy Berik Ýáli "Ádilet ministri jarlyqty durys túsindirmedi" dep málimdedi.
Marat Beketaev Memleket basshysynyń jýyrda qol qoiǵan Jarlyǵynyń mazmuny jóninde jýrnalisterdiń suraǵyna jaýap bergen bolatyn. Ministr kadrlyq taǵaiyndaýlarǵa qatysty "sońǵy sheshim – Qaýipsizdik keńesiniń quzyretinde" degen pikir aitty.
"Ádilet ministriniń túsindirmesin qisynsyz dep sanaimyn. Múmkin Beketaev myrza tilshilerdiń qysymynan abdyrap qalyp, qate tujyrym jasaǵan shyǵar. Degenmen mundai joǵary deńgeidegi laýazymdy tulǵa kez kelgen máseleni óziniń fýnktsionaldyq mindeti aiasynda árqashan biliktilikpen túsindirýi tiis", - dedi Prezidenttiń baspasóz hatshysy.
Berik Ýáli bul máselege túbegeili núkte qoiǵysy keletinin atap ótti.
"Konstitýtsiia – negizgi zań. Qujatta Memleket basshysynyń fýnktsiiasy men ókilettiligi anyq jazylǵan. Ártúrli kózqaras týǵyzǵan 2019 jyldyń 9 qazandaǵy jarlyqtyń erejesi bar. Soǵan sáikes, Prezident "Qazaqstan Respýblikasynyń memlekettik saiasi qyzmetshileri men ózge de laýazymdy adamdaryn qyzmetke kelisý, qyzmetke taǵaiyndaý jáne qyzmetten bosatý tártibi týraly erejede" kórsetilgen protsedýralardan tys sheshimderdi qabyldaýǵa quqyly", - dedi Ýáli.
Osyǵan bailanysty, Prezident qana memlekettiń basty laýazymdy tulǵasy, Konstitýtsiianyń kepili, Joǵarǵy Bas qolbasshysy retinde elimizdiń Ata zańyna sáikes, Úkimet múshelerin, kúshtik qurylym basshylary men ózge de vedomstvolardyń jetekshilerin, sondai-aq, óńirlerdiń basshylaryn taǵaiyndaýǵa qatysty barlyq sheshimderdi qabyldaidy, dedi ol.
"Pikirtalas týdyrǵan osy Jarlyqqa qatysty aitar bolsaq, ol tek rásimdik sipatta ǵana. Sondyqtan Memleket basshysynyń konstitýtsiialyq mindetteri men fýnktsiiasyn atqarýǵa eshqandai kedergi keltire almaidy", - dep túiindedi óz sózin Berik Ýáli.
