Ortalyq sailaý komissiiasynyń tóraǵasy Berik Imashev aldaǵy Májilis depýtattaryn sailaýǵa qatysty túsinik berdi, dep habarlaidy QazAqparat.
«QR Prezidentiniń Jarlyǵyna sáikes, búginnen bastap Májilis depýtattaryn sailaý boiynsha naýqan bastaldy. 2016 jylǵy 20 naýryzda sailanǵan Májilis depýtattarynyń konstitýtsiialyq ókilettik merzimi 2021 jylǵy naýryzda aiaqtalady. Sailaý zańnamasyna sáikes, Májilis depýttarynyń kezekti sailaýyn Prezident depýttardyń ókilettigi merziminiń aiaqtalýynan keminde bes ai buryn taǵaiyndaidy jáne ol eki aidan keshiktirmei ótkiziledi. Osylaisha, Parlament Májilisi depýtattarynyń sailaý naýqany qatań túrde osy belgilengen konstitýtsiialyq merzimderge sáikes taǵaiyndalýda jáne kezekti bolyp sanaly», - dedi Imashev Ortalyq sailaý komissiiasynyń otyrysynda.
Osy oraida ol joǵary ókildi organdarǵa sailaý eldegi eń mańyzdy qoǵamdyq-saiasi oqiǵalardyń biri ekenin atap ótti.
«Dál osy zań shyǵarýshy organ memleket tetiginde basym orynǵa ie jáne tek Parlament qana zań arqyly halyqtyń erkin bildirý quqyǵyna ie. Májilistiń 98 depýtatyn sailaý partiialyq tizimder boiynsha jasyryn daýys berý arqyly jalpyǵa birdei teń ári tóte sailaý quqyǵy negizinde júzege asyrylady. Májilistiń 9 depýtatyn halyq birligin, qoǵamdyq kelisim men turaqtylyqty nyǵaitýdyń negizgi institýty bolyp sanalatyn Qazaqstan halqy Assambleiasy sailaidy. Májilisti qalyptastyrýdyń birden bir printsipi Assambleianyń Parlament Májilisindegi ókildigi - ol bizdiń konstitýtsiialyq ereksheligimiz. Assambleia depýtattary 100-den astam etnos atynan barshanyń múddesin qorǵaidy. Olardyń múddesi partiialyq kózqarastarmen bailanysty emes, sondyqtan ol joǵary zań shyǵarýshy organnyń keń aýqymdy qyzmeti aiasynda barlyq fraktsiialarmen tiimdi áreket etýge múmkindik beredi», - dedi OSK tóraǵasy.
Budan buryn habarlanǵandai, Memleket basshysy Qasym-Jomart Toqaev QR Parlamenti Májilisi jáne máslihat depýtattary sailaýyn taǵaiyndaý týraly úndeý jariialady.
«Búgin men Parlament Májilisi depýtattarynyń sailaýyn taǵaiyndaý týraly Jarlyqqa qol qoidym. Ortalyq sailaý komissiiasynyń qaýlysymen barlyq deńgeidegi máslihat depýtattarynyń sailaýy taǵaiyndalady. Aldaǵy sailaý konstitýtsiialyq merzimge sáikes, 2021 jyldyń 10 qańtarynda ótedi. Barlyq saiasi partiialardyń bul sailaý naýqanyna qatysýǵa daiyndalýyna, sailaý aldyndaǵy platformasyn ázirleýine, partiialyq infraqurylymdardy jetildirýine ýaqyty jetkilikti boldy. Ortalyq sailaý komissiiasy men Bas prokýratýra sailaýdyń zańdylyǵyn, ashyqtyǵyn jáne ádildigin saqtaý úshin turaqty baqylaý júrgizip otyrady», - dedi Prezident.
