QR Úkimetiniń qaýlysymen Berik Saqbaiuly Aryn QR din isteri jáne azamattyq qoǵam vitse-ministri qyzmetinen bosatylyp, QR qoǵamdyq damý vitse-ministri laýazymyna taǵaiyndaldy, dep habarlaidy "Ult aqparat" ministrliktiń baspasóz qyzmetine silteme jasap.
Berik Aryn 1969 jyly Taldyqorǵan oblysynda dúniege kelgen. 1994 jyly Ál-Farabi atyndaǵy Qazaq ulttyq ýniversitetin «Filologiia» mamandyǵy boiynsha, 2007 jyly Qazaq memlekettik zań ýniversitetin «Quqyqtaný» mamandyǵy boiynsha támamdaǵan.
Eńbek jolyn 1994 jyly Qazaqstan Respýblikasynyń Syrtqy ister ministrliginiń Orta, Taiaý Shyǵys jáne Afrika elderi basqarmasynyń referenti, attashesi laýazymynan bastaǵan. 1996 jylǵy jeltoqsan aiynan 2001 jylǵy shilde aralyǵynda Qazaqstan Respýblikasynyń Saýd Arabiiasy Koroldigindegi Elshiliginiń attashesi, úshinshi hatshysy, ekinshi hatshysy, birinshi hatshysy laýazymdarynda qyzmet etken. 2001 jylǵy shildeden 2002 jylǵy naýryz aiy aralyǵynda QR SIM Afrika ekijaqty yntymaqtastyq departamentiniń bólim basshysy bolǵan. 2002 jyldyń naýryz aiynan qyrkúiek aiyna deiin - QR SIM Aziia, Taiaý Shyǵys jáne Afrika departamentiniń bólim basshysy. 2002 jylǵy qyrkúiek aiynan 2006 jylǵy aqpan aiy aralyǵynda - QR-nyń Egipet Arab Respýblikasyndaǵy Elshiliginiń keńesshisi. 2006 jylǵy aqpan aiynan 2007 jylǵy maýsym aralyǵynda - QR Prezidenti Ákimshiliginiń Syrtqy saiasat ortalyǵynyń bas inspektory. 2007 jylǵy maýsym - 2009 jylǵy jeltoqsan aralyǵynda - QR Parlamentiniń Senaty Apparatynyń Parlamentaralyq bailanystar jáne halyqaralyq yntymaqtastyq bóliminiń meńgerýshisi. 2009 jylǵy jeltoqsan - 2011 jylǵy jeltoqsan aralyǵynda - QR Parlamenti Senatynyń Apparaty basshysynyń orynbasary. 2011 jylǵy jeltoqsan - 2016 jylǵy qazan aiyna deiin - QR-nyń Egipet Arab Respýblikasyndaǵy Tótenshe jáne Ókiletti Elshisi boldy. 2012 jylǵy aqpan - 2016 jylǵy qazanǵa deiin - Arab Memleketteri Ligasy janyndaǵy Qazaqstan Respýblikasynyń Turaqty Ókili. 2012 jylǵy mamyrdan 2016 jylǵy qazan aiyna deiin - QR-nyń Marokko Koroldigindegi Tótenshe jáne Ókiletti Elshisi qyzmetin qosa atqarǵan. 2015 jylǵy sáýirden 2016 jylǵy qazan aiyna deiin - QR-nyń Aljir Halyq Demokratiialyq Respýblikasyndaǵy, Týnis Respýblikasyndaǵy Tótenshe jáne Ókiletti Elshisi qyzmetin qosa atqarǵan. 2016 jylǵy maýsym aiynan bastap qazirgi tańǵa deiin QR din isteri jáne azamattyq qoǵam vitse-ministri laýazymyn atqardy.
