Táýelsizdiktiń 25 jyldyǵynda Keiki batyrdyń bas súieginiń elge jetkizilýi igilikti shara. Bul týraly Astanadaǵy halyqaralyq áýejaida batyr babanyń bas súiegin qarsy alýǵa kelgen saiasattanýshy, qoǵam qairatkeri Berik Ábdiǵaliuly aitty, dep habarlaidy QazAqparat.
«Keiki batyrdyń bas súiegi elge jetkizildi, endigi kezekte Kenesary hannyń bas súiegin alyp kelý mindeti tur. Kóp jyldan beri Qazaqstannyń ǵalymdary izdestirý jumystaryn úzbei júrgizip keledi. Ázirge tabylmai jatyr. Osy rette Reseidiń ǵalymdary qosylyp, taýyp berse jaqsy bolar edi. Óitkeni, olarda kóptegen qujatty tekserip shyǵýǵa múmkindik bar»,-dedi qoǵam qairatkeri.
Sonymen qatar ol Qyrǵyzstan jerinde de tiisti zertteý jumystaryn júrgizý mańyzdy ekenin jetkizdi.
«Hannyń basyn tappasaq ta, Kenesarynyń qaza bolǵan jeri belgili ǵoi. Qyrǵyzstan jerinde zertteý jumystaryn tereńdetip, saraptamalyq jumystar júrgizýge bolady. Sondyqtan izdeýdi toqtatpaý kerek. Sebebi, bul qazirgi býynnyń paryzy dep bilemin»,-dedi Ábdiǵaliuly.
Onyń sózine qaraǵanda, osydan 10 jyl buryn ǵylymi jumystar arqyly Sankt-Peterbordaǵy antropologiialyq qordyń kýnstkamerasyna baryp, Keiki batyrdyń bas súiegin suraǵan eken. Sol kezde mýzei basshylyǵy bas súiekti bermeitindigin habarlaǵan kórinedi.
«Olar ózderiniń jaýabynda bas súiek Resei Úkimetiniń menshiginde turǵandyǵyn, budan basqa kýnstkamerada Kavkazdan jáne basqa da elderden kóptegen adamdardyń basy saqtaýly ekenin, eger bas súiekti Resei tarapy Qazaqstanǵa berse, qalǵan elder jappai suraý joldaitynyn aitqan bolatyn. Bul turǵyda mýzei basshylyǵy úkimet qaýlysy shyqqan jaǵdaida ǵana bizge tabystai alatynyn habarlady»,-dep naqtylady qoǵam qairatkeri.
.jpeg)