Qazaqstanda oralmandardy beiimdeý ortalyqtary qurylady. Bul týraly búgin halyqpen eseptik kezdesý ótkizgen QR Eńbek jáne halyqty áleýmettik qorǵaý ministri Berdibek Saparbaev aitty, dep habarlaidy QazAqparat.
«Eń aldymen otandastarymyzǵa Qazaqstannyń kez kelgen óńirinde ómir súrýge múmkindik beredi. Ekinshiden, qonys aýdarý barysynda qala ne bolmasa aýylǵa iaǵni, jergilikti jerlerge bailanysty otbasynyń árbir múshesine shamamen 8 myń teńge tólenedi. Eger páter ne bolmasa turǵyn úi birden berilmese, onda 12 ai boiy 30-dan 70 myń teńgege deiin tólenedi» dedi ministr.
Bul rette Berdibek Saparbaev osydan 10 jyl buryn elimizde oralmandardy beiimdeý ortalyqtary, jataqhanalar bolǵanyn eske saldy.
«Ókinishke orai, olardyń qaida ketkenin bilmeimin. Degenmen, onymen ainalysýymyz kerek. Qazirgi ýaqytta biz osy baǵytta jumys jasap jatyrmyz», - dedi ol. Sonymen qatar, Eńbek ministri bul máselege qatysty tiisti komitetke tapsyrma berilgenin atap ótti. «Bastapqy kezde qandai da bir baspana berilýi tiis. Olar ózge elden keldi, bul jerde tanystary da, týǵan-týystary da joq» dedi B.Saparbaev.
