Aqtóbe oblysynyń ákimi Berdibek Saparbaev Aqtóbede ótken «Munai men gazdyń kóleńkeli ainalymy máseleleri» aimaqaralyq forýmynda zańsyz munai men gaz ainalymy úshin jazany kúsheitýdi usyndy, dep habarlaidy "Ult aqparat" Baq.kz aqparat agenttigine silteme jasap.
Berdibek Saparbaev munai men gazdyń kóleńkeli ainalymy - Aqtóbe oblysymen qatar, jalpy Qazaqstan úshin de ózekti másele ekenin atap ótti.
– Bul ulttyq qaýipsizdik pen turaqtylyq máselesi bolyp tabylady. Munai men gazdyń kóleńkeli ainalymynyń aqyry barshaǵa aian, ol biýdjet kirisin joǵaltý, aqsha qarajatynyń elden ketýi, halyqtyń turmys jaǵdaiynyń tómendeýi, investitsiialyq jaǵdaidyń nasharlaýy. Osynyń bári memlekettik jáne úkimettik baǵdarlamalardyń oryndalýyna qaýip tóndiredi, - dep atap ótti óńir basshysy.
Aqtóbe oblysynda qazirgi tańda kómirsýtek shikizatynyń 29 jer qoinaýyn paidalanýshylary jemisti jumys jasap jatyr. Biyl 5,9 mln. tonna munai, 6,5 mlrd. tekshe metr gaz óndirý josparlanyp otyr. Memleket basshysynyń tapsyrmasyna sáikes, jaqyn aradaǵy bes jyldakásiporyndar munai-gaz salasyn jańǵyrtýǵa kem degende 60 mlrd teńge salatyn bolady. tek osy jyldyń ózinde 19 geologiialyq barlaý jumystary júrgizilmek.
Munai ónimderin urlaý jáne zańsyz satý kóbinese uńǵylardy saqtamaý saldarynan jáne enshiles firmalar arasynda jasasqan kelisimsharttar negizinde munai qubyrlaryna zańsyz túsip ketý arqyly munai-gaz kompaniialarynyń, qaýipsizdik qurylymdarynyń qyzmetkerlerimen kelissózder kezinde kezdesetini aityldy.
Máselen, 2014-2016 jyldary «SNPS» AQ-nyń «Keńqiiaq» ken ornynda uiymdasqan qylmystyq top ókilderimen 8 myń tonna munai urlanǵan, bul iske qatysy bar tulǵalar ustalyp, jazalandy.
Búginde Aqtóbe oblysynyń IID munai urlyǵy men ony zańsyz satýǵa qatysty 17 qylmystyq isti tekserýde.
– Kóleńkeli ainalym jekelegen uiymdasqan qylmystyq toptardy qarjylandyrý kózi bolyp tabylady, - dedi oblys ákimi.
Forým jumysyna QR bas prokýrorynyń orynbasary Andrei Lýkin, QR bas kólik prokýrory Marat Álihanov, QR bas áskeri prokýrorynyń orynbasary, Prezident ákimshiliginiń, UQK, IIM, Ulttyq biýro, QR shekara qyzmetiniń, salalyq ministrlikterdiń ókilderi, Atyraý, Batys Qazaqstan, Mańǵystaý jáne basqa da oblystardyń ákimderi men prokýrorlary qatysady.
