Foto: parlam.kz
Rýslan Berdenov sotta jaýapker Jienbai tarapynan aitylyp jatqan málimdemelerge áleýmettik jelide jaýap berdi, dep habarlaidy Ult.kz.
«Bul tek qana shantaj jáne qysym kórsetý áreketi. Sońǵy ret men ony sol kúni, dál ózi ańshy myltyǵynan atyp ketken keshte kórdim. Odan keiin bizde eshqandai bailanys bolǵan joq.
Keiinirek ol ókilderimen birge meniń qorǵaýshylarymmen bailanys ornatýǵa tyrysyp, «dostasýdy» usyndy. Keshirim berilse, shý kótermeimiz dedi, al bas tartqan jaǵdaida «aqparattyq jarylys» jasaimyz dep ses kórsetti. Tipti, aiyptalýshynyń ákesi ózin-ózi órteidi degen málimdeme jasalatynyn aitty», -dedi ol.
Men onyń jubaiyn da, otbasyn da tanymaimyn
Berdenov muny tikelei qysym dep baǵalap, qandai da bir qysym men arandatýǵa jol bermeitinin málimdedi. Sondai-aq qaqtyǵys kásibi, qyzmettik sipatta ekenin aityp otyr.
«Jaýapker kelisim aiasyndaǵy jumysyn adal atqarǵysy kelmedi, esep berýden jaltardy. Men tek ashyqtyq pen mindettemelerdiń oryndalýyn talap ettim. Al qoǵam nazaryn «qyzǵanysh», «jeke qatynas», «jubaiy» sekildi jalǵan sebepterge burý - manipýliatsiia, shyndyqtan alystatý. Men onyń jubaiyn da, otbasyn da tanymaimyn. Ol men úshin tek merdiger bolatyn.
Budan da soraqysy – búginde bul jalǵan málimdemelerge qala ákimine qatysty tustardy da qosyp jatyr. Bul taǵy da istiń aqiqatqa emes, qysym kórsetý men bedelge nuqsan keltirýge baǵyttalǵan óreskel manipýliatsiia ekenin dáleldeidi. Men mundai málimdemelerdi úzildi-kesildi joqqa shyǵaramyn jáne olardy moiyndamaimyn», -dedi Rýslan Berdenov.
Ádiletti, ashyq sotqa senemin
Ol depýtattyq ókilet merzimi aiaqtalǵan soń da, memleketke adal qyzmet etý jolynan taimaǵanyn, sońǵy úsh jylyn osy jolǵa arnaǵanyn jáne qala ákiminiń shaqyrýymen ákimdikke kelip, ashyq, adal jumys isteýge, halyqqa shynaiy kómek kórsetýge kúsh salǵanyn aitypty.
«Men sailaýǵa baryp, elimdi jaqsartqym keldi. Meniń artymda elimizge, ózgeristerge senetin jastar tur. Bul - úlken jaýapkershilik, men ony sezinemin. Ákimdiktegi jumysym da osy senimdi aqtaýǵa baǵyttalǵan. Maǵan qarsy aitylǵan jala, japqan jalǵan aiyptar meni jolymnan taidyrmaidy. Áli de ádiletti, ashyq sotqa senemin», -dedi Berdenov.
Densaýlyǵyna qatysty baiandaǵan ákim orynbasary denesinde ańshy myltyǵynyń 60-tan kóp qorǵasyn oqtary áli de baryn aitty. «Bul qujatpen rastalǵan fakt» dedi ol.
«Sottaǵy joqtyǵymdy, únsizdigimdi ózderine tiimdi jaǵyna buryp, qoǵamdyq pikirmen oinaǵysy keletinder bar. Biraq únsizdik kelisim degen sóz emes. Men ádiletti sotty kútip otyrmyn», - dedi Berdenov jazbasynda.
Jienbaidyń sottaǵy sózi
Keshe ótken sot otyrysynda aiyptalýshy Ernar Jienbai kinásin moiyndamaitynyn, tek "qorqytý úshin" jasalǵan áreket ekenin aitty. Ol Rýslan Berdenov áieline habarlama jazǵanyn aitty.
«Áielimniń telefonyna qarasam, Rýslan Berdenov oǵan laik basyp, "Sen ádemisiń!" dep jazǵan. Men budan artyq eshteńe oilaǵan joqpyn» , – dedi ol.
Oqiǵanyń mán-jaiy
Aita keteiik, biyl 21 sáýirde Shymkent qalasy ákimdigi ǵimaratynyń mańynda qala ákiminiń orynbasary Rýslan Berdenovke ańshylyq qarýdan oq atylǵan. Sheneýnik jaraqat alyp, aýrýhanaǵa jetkizilgen. 4 saǵattyq otadan keiin ol aman qaldy.
Kúdikti Ernar Jienbai esimdi azamat ustalǵan. Aiyptalýshyǵa "adam óltirýge oqtaldy" degen aiyp taǵylǵan.
Sot Shymkenttegi qylmystyq ister jónindegi mamandandyrylǵan aýdanaralyq sotynda ótip jatyr. Sot ashyq ótýde. Jábirlenýshi Berdenov sotqa qatyspady. Muny ol "densaýlyǵyna bailanysty" dep túsindirdi.
