Qoǵam belsendisi Dýlat Aǵadil Nur-Sultan qalasynyń tergeý izoliatorynda qaitys boldy. Bul aqparatty Nur-Sultan qalalyq politsiia departamentiniń baspasóz qyzmetine siltep, Qazaqstannyń birneshe aqparat quraly habarlady.
"1977 jyly týǵan Dýlat Aǵadil Nur-Sultandaǵy tergeý izoliatorynda qaitys boldy. Sotqa qurmet kórsetpegeni, sýdia men sot otyrysyna qatysýshylardyń ar-namysyna tigeni úshin Dýlat Aǵadildiń ústinen qylmystyq is qozǵalǵan", - deidi politsiia habarlamasynda.
Politsiia departamenti baspasóz qyzmetiniń jazýynsha "biyl qańtar aiynda Dýlat Aǵadilge aiyp taǵylyp, "eshqaida ketpeý" týraly shara qoldanylǵan. Tergeýge kelmegenine bailanysty sot sheshimimen 24 aqpanda qamaýǵa alynǵan".
"Tergeý izoliatorynyń kamerasynda onan ózge tórt adam boldy, olar Dýlat Aǵadilge kúsh qoldanylmaǵany jaily kýálik berdi. Meditsinalyq kýálik onyń qamaýǵa alynǵan sátte alkogoldi ishimdik ishkenin, mas ekenin kórsetti. Jedel járdem brigadasy keldi. Qaitys bolýyna "júrek talmasy sebep bolǵan". Denesinde qandai da bir jaraqattar joq. Sotqa deiingi tergeý jumystary bastaldy, - deidi Nur-Sultan qalalyq politsiia departamentiniń habarlamasynda.
Dýlat Aǵadil – áleýmettik problemalar jáne azamattyq quqyqty saqtaý máselesin kóterip júrgen belsendi. Biyl tamyz aiynan beri birneshe ákimshilik jazaǵa tartylyp, kem degende 60 táýlik qamaýda otyrǵan.
Ol 2019 jyldyń 16 jeltoqsanynda ruqsat etilmegen aktsiiaǵa qatysty dep aiyptalyp, 10 táýlikke qamalǵan edi. Qarashanyń ortasynda ákimshilik qamaýda otyrǵan Tselinograd aýdandyq tergeý izoliatorynan qashyp shyǵyp, ol áreketin "zańsyz qýdalaýǵa qarsylyǵym" dep túsindirgen. Politsiia eki kún boiy izdegen belsendi 15 qarashada ózi bas prokýratýra aldyna kelgen. Keiin ol "sot qaýlysyn oryndamaǵany úshin" taǵy 6 táýlikke sottalǵan bolatyn.
