Byltyr Kreml synshysy Aleksei Navalnyidy ańdyǵan FSB qyzmetkerleriniń oppozitsioner Vladimir Kara-Mýrzanyń da ýlanýyna qatysy bar. Olar 2015 jáne 2017 jyldary oppozitsioner ýlaný belgileri boiynsha aýrýhanaǵa túskenge deiin turaqty túrde Kara-Mýrzanyń izin ańdyp otyrǵan. Bellingcat tobynyń 11 aqpanda jaryq kórgen zertteýinde osyndai tujyrym jasalady.
"Bir baǵyttaǵy saparlar – 7 baǵyt jáne 14 reis – kezdeisoq sáikestikterdi statistikalyq turǵyda adam sengisiz jaitqa ainaldyrady. Kara-Mýrzanyń tanymaldyǵy jáne turaqty ańdýlar bul oqiǵany FSB tobynyń ózge de shabýyldaryna uqsata túsedi" dep jazdy Bellingcat.
2015 jyly áriptesterimen kezdesý kezinde Kara-Mýrzanyń jaǵdaiy kenetten nasharlaǵan. Dárigerler oǵan "intoksikatsiia jaǵdaiyndaǵy búirek aýry" degen diagnoz qoiǵan. Saiasatker uzaq ýaqyt jasandy komada boldy, jasandy apparattyń kómegimen ómir súrdi. Frantsiiada júrgizilgen saraptama saiasatkerdiń aǵzasynda aýyr metalldyń qalyptan tys kóp ekenin anyqtaǵan. Biraq reseilik sot-meditsinalyq saraptama saiasatkerdiń ýlanǵanyn rastamady.
2017 jyly aqpan aiynda da Kara-Mýrza dál sondai aýyr jaǵdaida Máskeý aýrýhanasyna túsip, tiri qaldy. Dárigerler sol kezde onyń tiri qalý múmkindigi shamamen 5 paiyz degen. Muny Kara-Mýrzanyń ózi dárigerlerden estigenin keiinirek aitty.
Bellingcat-tyń aitýynsha, FSB kriminalistika institýtynyń qyzmetkerleri Vladimir Kara-Mýrzany aýrýhanaǵa túskenge deiin eki jaǵdaida da duzaq ýaqyt ańdyǵan. 2015 jyly aýrýhanaǵa túspei turyp úsh ai buryn Kara-Mýrzanyń Resei qalalaryna sapary (Tomsk, Sankt-Peterbýrg, Kaliningrad, Qazan) kezinde FSB qyzmetkeri keminde tórt ret sońynan júrip otyrǵan. Mysaly, Kara-Mýrza 2015 jyly 22-24 mamyr kúnderi Qazanda bolǵan. Kara-Mýrza ýlaný belgileri baiqalǵanǵa deiin 48 saǵat ishinde Máskeýge qaitqan.
Barlyq saparlarda FSB qyzmetkeri delingen Aleksandr Samofal saiasatkerdi ańdyǵan. Bellingcat-tyń "qara naryqtan" satyp alǵan derekter qorynda Samofalǵa 2006 jyly berilgen júrgizýshiler kýáligi týraly aqparat ta bar. Onda Samofaldyń mekenjaiy retinde "2567 áskeri bólimi" kórsetilgen. Bul FSB-nyń Máskeý túbindegi Golitsyndaǵy shekara qyzmeti akademiiasynyń mekenjaiymen sáikes keledi. 2015-2016 jyldary Samofal Kara-Mýrzanyń sońynan 12 ret ańdyǵan. Onyń janynda birneshe ret FSB kriminalistika institýtynyń qyzmetkeri delingen Konstantin Kýdriavtsev (Aleksei Navalnyidy ýlaýǵa qatysty zertteýde aitylǵan), sonymen birge FSB-nyń 2-basqarmasynyń aǵa ofitseri Roman Mezentsev bolǵan.
Zertteý avtorlarynyń paiymdaýynsha, FSB toby aimaqta meditsinalyq qyzmet kórsetý sapasy Máskeýge qaraǵanda nashar bolǵandyqtan emes, aimaqta baqylaýdaǵy adamdar jatatyn qonaq úi bólmesine kirý ońaiyraq bolǵandyqtan aimaqta ýlaýdy qup kórgen. Al astanada ýlanǵan Kara-Mýrza jaǵdaiynda arnaiy toptyń ańdyǵanyn saiasatkerlerdiń saparlary anyqtaýǵa múmkindik bergen.
Saiasatkerdi ekinshi ret ýlaǵannan keiin Kara-Mýrzanyń áieli Evgeniia aýrýhanadan onyń qan úlgisin alyp, FBR agentterine tapsyrǵan. Oǵan úlgini Himiialyq qarýǵa tyiym salý jónindegi uiym akkreditatsiialaǵan zerthanada zertteýge ýáde bergen. Alaida keiinirek FBR onyń nátijesin aitýdan bas tartqan.
Sot vedomstvodan nátijesin jariialaýdy talap etkennen keiin FBR "qupiia" degen jeleýmen eseptiń tek úzindilerin ǵana jariialaǵan. Jariialanǵan derekterde Kara-Mýrzaǵa ý berý aldyn ala josparlanǵany jazylǵan, biraq naqty qandai zatpen ýlaǵany aitylmaǵan.
The Insider men Bellingcat aitýynsha, 2018 jyldyń qańtar ailarynda AQSh-qa FSB jetekshisi Aleksandr Bortnikov, Resei syrtqy barlaý qyzmetiniń jetekshisi Sergei Naryshkin, GRÝ direktory Igor Korobov ushyp barǵan. Zertteýshiler olardyń keibiri FBR basshylyǵy ókilimen kezdesýi múmkin dep boljaidy.
"Kara-Mýrza týraly iste bul kezdesýdiń atap ótilýi onyń máselesi kezdesý kezinde talqylanǵanynan habar beredi, al olai bolsa analiz qorytyndysyn jariialaýdan bas tartý qandai da bir kelisimniń bir bóligi bolýy múmkin" deidi zertteý avtorlary.
