Búgin Belgiia biligi koronavirýs infektsiiasymen aýyratyndar sanynyń ósýine bailanysty karantindik sharalardy qatańdatý týraly sheshim qabyldady, dep habarlaidy "Ult aqparat".
Jańa sharalar 2 qarashadan bastap kúshine enedi jáne aǵymdaǵy jyldyń 13 jeltoqsanyna deiin kúshinde qalady. Belgiia turǵyndaryna úide bir ǵana adamdy qabyldaýǵa ruqsat etiledi, ol jaqyn týysy bolǵan jaǵdaida ǵana. Jalǵyz basty adamdar eki adamdy qabyldai alady, biraq áleýmettik ara qashyqtyqty saqtaý kerek.
Azyq-túlik dúkenderinen basqa barlyq dúkender jumysyn toqtatady. Sulýlyq salondary da jumystaryn toqtatady. Belgiia mektepterindegi kúzgi demalys 13 qarashaǵa deiin sozylady.
Qashyqtyqtan jumys isteý barlyq qyzmetkerler úshin mindetti bolmaq. Qonaq úilerdegi meiramhanalar men barlar jabyq bolady, bólmede ǵana tamaqtanýǵa ruqsat. Jerleý rásimine 15-ten artyq adam qatysa almaidy. Ultqa beineúndeýinde Belgiia premer-ministri Aleksandr de Kroo koronavirýspen kúreste birlese jumys isteýdiń mańyzdylyǵyn atap ótti.
«Elimizdegi jaǵdai óte qiyn», - dedi A.Kroo, búkil el boiynsha virýs juqtyrǵandar men ólim kórsetkishteriniń ósýine nazar aýdara otyryp.
Belgiianyń Ministrler kabineti basshysynyń aitýynsha, búgingi tańda birinshi jáne jalǵyz basymdyq - dárigerlerge kómek kórsetý jáne jaǵdaidy ózgertý.
«Virýstyń ósýi toqtaýy kerek», - dedi Belgiia premer-ministri.
Sondai-aq virýstyń adamdardy jas nemese kári dep tanymaitynyn eskerte kele, ásirese jastardy karantin sharalaryn saqtaýǵa shaqyrdy.
«24 jastaǵy adamnyń ómiri biz úshin 74 jastan góri qymbat bolǵandyqtan emes, kóptegen jastar bul virýs olarǵa áser etpeidi dep oilaidy. «Altyn erejeler» bizde bar eń mańyzdy qarý bolyp qala beredi», - dep De Kroo erejelerdiń saqtalatynyn meńzedi. Sondai-aq ol arqany keńge salý problemalardy odan saiyn ýshyqtyratynyn jetkizdi.
Belgiia koronavirýs juqtyrǵandar sany boiynsha 23-shi orynda.
29 qazanda bul elde 368 337 myń adam tirkelse, 11170 adam qaitys bolǵan. Iaǵni ólim-jitim 3,03% paiyzdy qurap otyr. Tolyqtai 23 969 adam jazylyp shyqqan.
