Belgisiz bireýler Qazaqstannan Qyrǵyzstanǵa 200-den asa iri qarany zańsyz aidap ótkizbek bolǵan, - dep habarlaidy Tengrinews.kz agenttigi UQK Shekara qyzmetiniń Almaty oblysy boiynsha departamenti baspasóz qyzmetine silteme jasap.
Oqiǵa Qarasai aýdany boiynsha Shekara basqarmasynyń "Qastek" shekara bólimi ýchaskesinde bolǵan. Aqparat boiynsha, shekara otriady shekara syzyǵynda buzylǵan injenerlik qorshaýdy anyqtaǵan.
"Jedel-izdestirý is-sharalaryn júrgize otyryp, shekarashylar iri qara maldy aidap ótkizýge árekettengen alty adamdy tapty. Shekarashylar kele jatqanyn kórip, olar oqiǵa ornynan qashyp ketken. Óz kezeginde shekara kúzetindegi iesiz iri qara mal memlekettik shekaradan birneshe shaqyrym jerde ornalasqan shekara beketine jetkizildi", - dedi vedomstvo ókilderi.
Qazirgi ýaqytta bul derek tekserilip jatyr.
