Azattyqtyń Qazaq redaktsiiasy Almaty biýrosynyń veb-redaktory, jýrnalist Rahat Mamyrbek dúnieden ozdy, dep habarlaidy "Ult aqparat".
Jýrnalist 11 jeltoqsan kúni densaýlyǵy kenetten nasharlap, insýltpen aýrýhanaǵa túsken jáne búgin tańerteń Almaty aýrýhanasynda kóz jumǵan.
Rahat Mamyrbek 1978 jyly 10 aqpanda Semei oblysy (qazirgi Shyǵys Qazaqstan oblysy) Aiagóz aýdany Tarbaǵatai aýylynda dúniege kelgen. Almaty memlekettik ýniversitetiniń filosofiia jáne saiasattaný fakýltetin támamdaǵan.
Jýrnalistikadaǵy qyzmetin 2001 jyly «Qazaqstan» ulttyq telearnasynda, «Mezgil» aqparattyq-saraptamalyq baǵdarlamasynyń redaktory bolyp bastaǵan. Keiinirek, ár jyldary KTK, 31 arna jáne «Almaty» telearnalarynda jumys istegen. «Qazaqstan» telearnasynda jergilikti teleaýditoriiaǵa keń tanylǵan "Kúltóbe" telehabarynyń avtory ári moderatory bolǵan.
2010 jyldan beri «Azattyq» radiosynyń Almaty biýrosynda veb-redaktor bolyp qyzmet atqarǵan.
Óziniń bilimi men biligin, aqyly men parasatyn qatar úilestirip, sanaly ǵumyrynda búgingi buqaralyq jýrnalistikanyń damýyna eleýli úlesin qosqan, "ar men namys minberinde" eldegi qyzýy tarqamaǵan saiasi-áleýmettik, mádeni-rýhani máselelerdi kóterip, bar bolmysymen ulttyq sana-sezimniń oianýyn qalaǵan, sóitip, týǵan halqynyń igiligine qaltqysyz qyzmet etken azamattyń esimi ýaqytpen birge jasai bermek. Biz bolsaq, óz kezegimizde, mezgilsiz dúnieden ozǵan qazaqtyń aimańdai perzentiniń otbasyna, týǵan-týystary men jaqyndaryna, joldastary men zamandastaryna qaiǵyryp kóńil aitamyz. Jaratqan qazanyń artyn qaiyrly qylyp, marqumnyń izin jalǵap, otyn óshirmes urpaǵyna uzaq ta baiandy ómir bergei!..
