20 qarashada ótetin kezekten tys Prezident sailaýyna taǵy bir áiel kandidat usynyldy, - dep habarlaidy "Ult aqparat".
Búgin Astanada "Qazaq analary - dástúrge jol" qoǵamdyq birlestiginiń jalpy jinalysy ótip, onda prezidenttikke kandidat usyný máselesi qaralǵan.
"Jinalysqa qatysýshylar belgili qoǵam qairatkeri, quqyq qorǵaýshy Tursynbekova Saltanat Parhatqyzyn aldaǵy Qazaqstan Prezidentiniń kezekten tys sailaýyna kandidat retinde usyndy.
Birlestik basshysy Ainur Júginisova Tursynbekova Saltanat Parhatqyzy ana men balany qorǵaýǵa, otbasy institýtyn nyǵaitýǵa, ulttyq-rýhani qundylyqtardy nasihattaýǵa belsendi atsalysyp júrgenin aitty", - delingen habarlamada.
Kandidatýrany birlestiktiń elordadaǵy 20 ókili men jiynǵa beinebailanys arqyly qatysqan 18 óńirdegi músheleri qoldaǵan.
Saltanat Tursynbekova – belgili qoǵam qairatkeri, QR Prezidenti janyndaǵy Áielder isteri jáne otbasy-demografiialyq saiasat Ulttyq komissiiasy tóraǵasynyń orynbasary. Sońǵy jyldary turmystyq zorlyq-zombylyqqa qarsy jáne onyń aldyn alýǵa arnalǵan birneshe áleýmettik jobalarǵa jetekshilik etken.
Astana qoǵamdyq keńesiniń múshesi. Sondai-aq, "Otbasynda zorlyq-zombylyqsyz Qazaqstan" jobasynyń jetekshisi bolǵan.
Ol 1966 jyly Jambyl oblysynda týǵan, otbasyly, 2 bala tárbilep otyr. Memlekettik qyzmettegi jumys ótili 30 jyldan asady.
«Qazaq analary-dástúrge jol» qoǵamdyq birlestigi Saltanat Tursynbekovanyń qujattaryn búgin Ortalyq sailaý komissiiasyna tapsyrmaq.
Aita keteiik, 7 qazanda «Kásibi áleýmettik jumyskerler Ulttyq aliansy» respýblikalyq qoǵamdyq birlestigi kezekten tys prezident sailaýyna Qaraqat Jaqsylyqqyzy Ábdenniń kandidatýrasyn usynǵan bolatyn.
