Qazaqstan Respýblikasynyń
Bas prokýrory
J.Asanov myrzanyń nazaryna!
Qazaqta «Aitaiyn dep aitqam joq, Aitashymnan obal-dy» dep keletin kóne óleń bar. Sol aitpaqshy, meniń de aitpasyma bolmaityn másele týyndap tur. Týyndap emes, bul másele sońǵy kezde balalap, kóbeiip, derttep, balaqtan basqa shyǵyp ketkeli qashan?! Sondaǵy aitpaǵymyz tómendegishe:
Byltyr ǵana óziniń tabandylyǵymen, qabiletimen, sońǵy kezde jurt shýlai jónelip, shubyrtpalatatyn «shymkenttik variant» jasamai, óz kúshimen, mańdai terimen Saryaǵash aýdandyq bilim bólimine ádil konkýrs arqyly basshylyqqa taǵaiyndalǵan Murat Mahanov jazyqsyzdan jazyqsyz isti bolyp jatqanynan qalyń jurt habardar. Men Murat myrzanyń aýdan halqyna, aýdandyq bilim salasyna sińirgen eńbekterin tizbelep jatpaimyn. Sebebi, ol týraly tolyq málimetter Sizderge jetip te úlgergen bolýy kerek. Eger asa mártebeli nazarlaryńyzdy salsańyzdar. Meniń aitpaǵym basqa...
Men sonaý alty atadan jalǵyz kindik bop kele jatqan, óziniń de jalǵyz tal on-aq jasar búldirshin uly bar (ony da jalǵyz ózi tárbielep otyrǵan), osy qazir pálen aidan beri tergeý izoliatorynda jazyqsyzdan jazyqsyz temir torǵa telmirip otyrǵan Murattyń jeke basyna toqtalmaqpyn.
Men sol Muratpen Shymkent pedagogikalyq institýtynyń filiologiia fakýltetinde tórt jyl birge oqyp, bir jataqhanada jatqan, jarty qurtty bólip jegen adammyn. Onyń minez-qulqyn, azamattyǵyn, jan balasyna janyn qiia salýǵa daiyn turatyn janashyrlyǵyn jaqsy bilemin. Jalǵyz ananyń qolynda jalbyrap jalǵyz ósken ul ekenin, qinalyp júrip jetilgenin, oqýǵa da joǵaryda aitylǵan «shymkenttik variantpen» emes, qurylysta jumys istep, odan ásker qataryna baryp kep, es jiyp túskenin de beske tanimyn.
Bizdiń damyǵan, tolyqqandy qoǵam bolamyz, pálen eldiń qatarynan kórinemiz dep keýde qaǵyp, shirengende úzeńgimizdi úzip jibere jazdaitynymyz ótirik emes. Al endi mynandai soraqylyqtan soń, kórer kózge ádil jolmen júrip, kisi aqysyn jeýge arlanǵan, adaldyqqa ǵana adymdaǵan azamatty qorlap, japtym jala, jaqtym kúie dep júrip qaida baramyz?! Qai jerlerge jete alamyz?!
Men 111 jas ǵumyr keshken, eki soǵysqa kýá bolǵan qariianyń balasymyn. Ilgeride qarttar bar bolatyn. Qazir she?! Sol Mahanovtyń jańashyldyǵy men janashyrlyǵyna, sońǵy kezde bedeli ábden túsip bara jatqan MUǴALIM, USTAZ ataýlynyń bedelin qaita kóterip, eńsesin tikteýge atsalysqan tirligine Saryaǵash aýdanyndaǵy birer «toptardyń» qarsy áreket etkeninen búkil aýdan habardar. Olar qarttar emes. Olar «dejýrnyi shaldar» ǵana. Iia, olar ShALDAR ǵana. Alash balasyna ataly sóz aityp, aýzyna qaratyp, qara qyldy qaq jaratyn jasqa jetkende nápsisi taza adamnyń artyna shala bailap, jala jabatyn jasqa kelgen kisi qariia iaki qart bola alýshy ma edi?! Joq!
Óz basym sýdy da, otty da, oqty da, sotty da kóp kórgen adammyn. Sondyqtan, eshteńeden hám eshkimnen (eger ol adamzat balasy bolsa) qoryqpaitynym ózime aian. Kim ne dese o desin, degenmen meniń ózimniń azamattyq ustanymym, aqyndyq kózqarasym men daýsym bar. Endeshe, men Murat Mahanaovtyń jazyqsyzdan jazyqsyz isti bolyp, jabylyp jatqanyn óte úlken saiasi jáne qoǵamdyq, áleýmettik qatelik dep esepteimin. Kezinde talystai ǵyp sulatyp, atyp tastaǵan arysymyz Ahmet Baitursynuly «Maǵan qatty batatyny bárinen, Óz aýylymnyń itteri úrip, qapqany» demep pe edi?! Onda nege ary taza, jany jumsaq, peiili perishte azamattyń artynan birer sháýildekterdi sháý-sháý úrgizip, jalǵan jala japtyryp, qarap otyrýymyz kerek?!
Qasietti Quranda «Ásilinde bireýdiń artynan jalǵan sóz aityp, nahaq jala japqan pendeniń kúnási dýa jasaǵan pendeniń kúnásimen birdei» degen sóz bar. Al, dýa jasaý degenińiz eń aýyr, keshirilmes kúná. Ony oilaityn pende, sanasy quldyqtan azat QARIIa áz-ázirge tabylmai turǵany óte ókinishti. Budan da kóp jazýǵa, qulash-qulash, bet-bet etip shimailaýǵa múmkindigim barshylyq. Biraq, mynandai ádiletsizdikke, misyzdyqqa, arsyz áreketke yzasy kep otyrǵan adamnyń júregi shydamaidy eken.
Asa qadirli Jaqyp dep asa uly paiǵambarymyzdyń (Ǵ.S) esimin bergen el aǵasy, qalyń qazaqtyń qazylyq tarazysy!
Sizdi jurtshylyq tek qana ádildikke júretin, adaldyqty tý etken azamat dep baǵa beretinin talai estidik. Kórip te júrmiz. Sondyqtan, osy máselege sońǵy ári ádil núkteni Ózińiz qoiyp, istiń aq sheshilýine, arly azamattyń nápsige qul bolyp júrgen birer múddeli «toptyń» qurbany bolyp ketpei, qoǵamdaǵy óziniń ádil ári taza ornyna qaita ornyǵýyna yqpal jasaitynyńyzǵa senim artamyn. Támat-támám!!!
Ózińizge degen úlken qurmetpen jáne úkili úmitpen,
Aqyn, Qazaqstan Jazýshylar odaǵynyń múshesi,
Qazaqstan Jazýshylar odaǵy Ońtústik Qazaqstan
oblystyq filialynyń direktory,
kóptegen halyqaralyq, respýblikalyq syilyqtardyń,
Resei Federatsiiasy Qarýly kúshteriniń eń joǵarǵy
«Slava Rossii» ordeniniń eń sońǵy altynshy tolyq
kavaleri, basqa da kóptegen orden-medaldardyń iegeri
Baqytjan ALDIIaR
