Belgili teatr jáne kino akteri, Qazaqstannyń eńbek sińirgen ártisi Tóleýbek Aralbai dúnieden ozdy. Qaraly habardy Muhtar Áýezov atyndaǵy Qazaq ulttyq akademiialyq drama teatry jetkizdi.
«Qazaq óneri men mádenieti aýyr qazaǵa ushyrady. 72 jasqa qaraǵan shaǵynda teatr jáne kino akteri, Qazaqstannyń eńbek sińirgen artisi, «Qurmet» jáne «Parasat» ordenderiniń iegeri Tóleýbek Muhamedjanuly Aralbai dúnie saldy» dep jazdy teatrdyń baspasóz qyzmeti Instagram paraqshasynda.
Tóleýbek Aralbai 1950 jyly 18 naýryzda Semei qalasynda dúniege kelgen.
Ónerge qushtar ol bala kezinen-aq qaladaǵy Pionerler Saraiynyń drama úiirmesine qatysqan. Onyń ónerdegi eń alǵashqy ustazy ataqty rejisser I.Vishnevskii boldy. 1964-1966 jyldary Semei oblystyq mýzykalyq drama teatry janyndaǵy stýdiiany oqyp bitirgen soń teatrdyń qazaq tobyna qabyldanyp, alǵashqy rólderin somdady.
1970-1973 jyldary áskeri boryshyn ótegen soń Qazaq Memlekettik M.Áýezov atyndaǵy akademiialyq drama teatry janyndaǵy eki jyldyq stýdiiaǵa oqýǵa túsip, belgili sahnager Raiymbek Seitmetovtiń klasynan 1975 jyly bitirip shyǵady da, kórkemdik keńestiń sheshimimen qarashańyraq teatrdyń akterlik tobyna qabyldanady.
Teatr spektaklderine stýdiiada oqyp júrgende-aq qatysqan onyń alǵashqy róli O.Bókeevtiń «Qulynym meniń» dramasyndaǵy Jigit edi.
Sodan beri ótken qyryq eki jyl ishinde ol sahnanyń úlken sheberine ainaldy.
Akter Tóleýbek Aralbaidyń qazaq kinosyna da eńbegi sińdi. Ár jyldary túsirilgen «Ajdaha jyly», «Shoqan Ýálihanov» (rej.A.Áshimov),, «Aziat» (rej.L.Aranysheva), «Qyzjylaǵan», «Mustafa Shoqai», (rej.S.Narymbetov), «Reketir», «Likvidator» (rej.A.Sataev) kórkem filmderinde, sondai-aq «Toǵysqan taǵdyrlar», «Sarancha» (rej.A.Qarpyqov) teleserialdaryndaǵy rólderimen sheber akter retinde jaqsy tanyldy.
Akter, rejisser shyǵarmashylyǵynyń eleýli bir qyry – ustazdyq. 1993 jyldan beri Respýblikalyq J.Elebekov atyndaǵy estrada-tsirk kolledjinde «akterlik sheberlik» páninen sabaq bergen Tóleýbek Aralbaidyń shákirtteri búgingi kúni respýblika teatrlarynda hám ózge de óner ordalarynda jemisti eńbek etip júr.
