«Óner qyrandary» ázil-syqaq teatrynyń akteri Melis Naýryzbekovtyń densaýlyǵy kúrt nasharlap, qazirgi ýaqytta tósek tartyp jatqanyn teatr direktory Madiiar Serikbaev málimdedi, dep habarlaidy ult.kz.
Onyń aitýynsha, akter bel omyrtqasyna bailanysty kúrdeli ota jasatqan. Dárigerler oǵan alty ai boiy tynyǵyp, qozǵalysty shekteýdi usynǵanymen, óner iesi gastroldik saparlarǵa qatysýyn jalǵastyrǵan.
«Melis densaýlyǵyna bailanysty jatyp qaldy. Gastrol aldynda operatsiia jasatty. Dárigerler alty ai boiy turmaýdy eskertken edi. Biraq kontsertterge shyǵýǵa májbúr boldy. Taldyqorǵanǵa baryp kelgennen keiin jaǵdaiy qaita nasharlap, em qabyldady. Qazir belden tómengi jaǵy syr berip, aiaǵy istemei qalǵan. Kontsertterge aýyrsynýdy basatyn dárilerdiń kómegimen shyqty», – dedi Madiiar Serikbaev.
Qazir akterdiń jaǵdaiy baqylaýda. Áleýmettik jeli qoldanýshylary men áriptesteri oǵan saýyǵyp ketýine tilektestik bildirip, duǵada ekenin jazýda.
