Belarýste Shklov qalasyndaǵy túrmede kóz jumǵan saiasi tutqynnyń denesi týystaryna berildi, máiittiń basy bintpen oraýly bolǵan. Bul týraly otbasynyń tanystary jergilikti aqparat agenttikterine habarlaǵan. Vitold Ashýroktyń qaitys bolǵany ótken juma kúni habarlanǵan, biraq onyń máiiti týystaryna tek seisenbi kúni kúndiz ǵana berilgen. Tutqynnyń neden qaitys bolǵany belgisiz.
50 jastaǵy Ashýrok bilikke qarsy narazylyq sharalaryna qatysqany úshin bes jylǵa bas bostandyǵynan aiyrylǵan. Oǵan qańtar aiynda sot úkimi shyqty. Túrme ákimshiligi týystaryna onyń júregi toqtap qalǵanyn aitqan. Osy apta basynda Ashýroktyń áieli aqparat quraldaryna marqum kúieýiniń eshqashan júrek aýrýyna shaǵymdanbaǵanyn jetkizgen.
Belsendiniń máiitin alý úshin marqumnyń týystarymen birge máiithanaǵa barǵan otbasynyń tanysy, jýrnalist Olga Bykovskaia "Belsat" agenttigine Ashýroktyń "basy mańdaiynan bastap murnyna deiin binttelgenin, tek aýyzy ǵana kórinip turǵanyn" habarlaǵan. Biraq Ashýroktyń otbasy bul jóninde sóilesýge yqylas tanytpaǵan. Bykovskaianyń sózine qaraǵanda, týystary qosymsha saraptama jasaýdan da bas tartqan.
Seisenbi kúni keshke Belarýs tergeý komiteti koloniiada túsirilgen montajdalǵan video jariialady. Onda saiasi tutqyn Ashýroktyń belgisiz sebeppen eki ret qulaǵany kórinedi. Birinshi ret qulaǵannan keiin túrme qyzmetkerleri onyń basyn bintpen orai bastaǵan. Degenmen videodaǵy adam Ashýrok pa, joq pa, ol jaǵy anyq emes.
