بەلارۋستە شكلوۆ قالاسىنداعى تٷرمەدە كٶز جۇمعان ساياسي تۇتقىننىڭ دەنەسٸ تۋىستارىنا بەرٸلدٸ, مەيٸتتٸڭ باسى بينتپەن وراۋلى بولعان. بۇل تۋرالى وتباسىنىڭ تانىستارى جەرگٸلٸكتٸ اقپارات اگەنتتٸكتەرٸنە حابارلاعان. ۆيتولد اشۋروكتىڭ قايتىس بولعانى ٶتكەن جۇما كٷنٸ حابارلانعان, بٸراق ونىڭ مەيٸتٸ تۋىستارىنا تەك سەيسەنبٸ كٷنٸ كٷندٸز عانا بەرٸلگەن. تۇتقىننىڭ نەدەن قايتىس بولعانى بەلگٸسٸز.
50 جاستاعى اشۋروك بيلٸككە قارسى نارازىلىق شارالارىنا قاتىسقانى ٷشٸن بەس جىلعا باس بوستاندىعىنان ايىرىلعان. وعان قاڭتار ايىندا سوت ٷكٸمٸ شىقتى. تٷرمە ەكٸمشٸلٸگٸ تۋىستارىنا ونىڭ جٷرەگٸ توقتاپ قالعانىن ايتقان. وسى اپتا باسىندا اشۋروكتىڭ ەيەلٸ اقپارات قۇرالدارىنا مارقۇم كٷيەۋٸنٸڭ ەشقاشان جٷرەك اۋرۋىنا شاعىمدانباعانىن جەتكٸزگەن.
بەلسەندٸنٸڭ مەيٸتٸن الۋ ٷشٸن مارقۇمنىڭ تۋىستارىمەن بٸرگە مەيٸتحاناعا بارعان وتباسىنىڭ تانىسى, جۋرناليست ولگا بىكوۆسكايا "بەلسات" اگەنتتٸگٸنە اشۋروكتىڭ "باسى ماڭدايىنان باستاپ مۇرنىنا دەيٸن بينتتەلگەنٸن, تەك اۋىزى عانا كٶرٸنٸپ تۇرعانىن" حابارلاعان. بٸراق اشۋروكتىڭ وتباسى بۇل جٶنٸندە سٶيلەسۋگە ىقىلاس تانىتپاعان. بىكوۆسكايانىڭ سٶزٸنە قاراعاندا, تۋىستارى قوسىمشا ساراپتاما جاساۋدان دا باس تارتقان.
سەيسەنبٸ كٷنٸ كەشكە بەلارۋس تەرگەۋ كوميتەتٸ كولونييادا تٷسٸرٸلگەن مونتاجدالعان ۆيدەو جارييالادى. وندا ساياسي تۇتقىن اشۋروكتىڭ بەلگٸسٸز سەبەپپەن ەكٸ رەت قۇلاعانى كٶرٸنەدٸ. بٸرٸنشٸ رەت قۇلاعاننان كەيٸن تٷرمە قىزمەتكەرلەرٸ ونىڭ باسىن بينتپەن وراي باستاعان. دەگەنمەن ۆيدەوداعى ادام اشۋروك پا, جوق پا, ول جاعى انىق ەمەس.
