Belarýstiń "Naftan" jáne "Mozyrskii" munai óńdeý zaýyttary 1 qańtardan bastap Reseiden shikizat ákelýdi toqtatqanyn habarlady. Bul aqparatty Azattyqtyń Belarýs qyzmeti taratty.
Máskeý men Minsk áli kúnge deiin tasymaldanatyn munai baǵasy, Belarýs aýmaǵy arqyly ótetin shikizat tranzitiniń tarifi jáne Reseidiń salyq júiesindegi ózgeristerge bailanysty shyǵynǵa batqan Belarýstiń munai óńdeý zaýyttaryna ótemaqy tóleý máselesi boiynsha kelisimge kele almai otyr.
Munai óńdeý zaýyttary 1 qańtardan bastap Resei shikizatyn tasymaldaýdy tolyq toqtatqanyn, munai kompaniialarymen jańa kelisim bolmaǵanyn aitty. "Naftan" men "Mozyrskii" ótken jyldan qalǵan ónimdermen jumys istep jatyr.
"Belneftehim" ókili "Interfaks" agenttigine tasymaldaýdyń toqtaǵanyn rastap, zaýyttardyń júktemesi azaiǵanyn aitty. Reseilik operator "Transneft" ókilderi qazirgi kezde Belarýske munai tasymaldaý boiynsha ótinish túspegenin jetkizdi. Biraq olardyń aitýynsha, Belarýs arqyly tranzitke shekteý joq.
Minskige munai tasymaldaý boiynsha kelisim merzimi 1 qańtarda aiaqtalǵan. Alaida taraptar tasymaldaý sharttary boiynsha kelisimge kele almaǵan. Sarapshylardyń aitýynsha, Belarýs baǵany arzandatýdy surasa, Resei munymen kelispeidi. Minsk shikizat tasymaldaýdyń balama joldaryn izdeitinin málimdegen.
Kremldiń baspasóz hatshysy Dmitrii Peskov ázirge Minskimen kelisim jasalǵan joq, biraq dialog ári qarai da jalǵasa beredi dedi.
