Nursultan Nazarbaev Belarýs Respýblikasynyń Prezidenti Aleksandr Lýkashenkomen kezdesti, - dep habarlaidy "Ult aqparat" Aqordaǵa silteme jasap.
Memleket basshysy Belarýs Respýblikasynyń Prezidentimen kezdesý barysynda oǵan Shanhai yntymaqtastyq uiymynyń sammitine jáne «Astana EKSPO-2017» dúnie júzilik kórmesiniń ashylýyna qatysý úshin Qazaqstanǵa kelgenine alǵys aitty.
– Eki jarym jyl ishinde tiisti infraqurylymy bar tutas bir aýdan salyndy. Kórmege qatysýshylar úshin turǵyn úiler, qonaq úi kesheni, kongress-hol jáne osy aýqymdy is-sharany ótkizýge qajetti basqa da ǵimarattar boi kóterdi. Kórmeni ótkizgen soń bul jerde Astana halyqaralyq qarjy ortalyǵy jumys isteitin bolady, – dedi Nursultan Nazarbaev.
Qazaqstan Prezidenti halyqaralyq kórmeniń negizgi ideiasyna toqtalyp, kórmeniń basty nysany – «Nur Álem» pavilonyndaǵy ekspozitsiialar týraly aitty.
Belarýs Respýblikasynyń Prezidenti Nursultan Nazarbaevqa halyqaralyq kórmeniń ashylýyna qatysýǵa shaqyrǵany úshin rizashylyq bildirdi.
– Biz pavilondardy aralap kórip qana qoimai, sizderdiń ekspozitsiialyq keshender qurylysyndaǵy tájiribelerińizdi muqiiat zerttemekpiz. Óitkeni biz de halyq sharýashylyǵy jetistikteri kórmesin uiymdastyrýdy josparlap otyrmyz, – dedi A.Lýkashenko.
Sonymen qatar, Belarýs Prezidenti Nursultan Nazarbaevtyń tarihty zertteýde ádilettilikti qalpyna keltirýge jete kóńil bóletinin atap ótti.
– Siz burynǵy lagerdiń ornynda «ALJIR» mýzeiin ashýǵa kóp kúsh jumsadyńyz. Bul lagerde burynǵy Odaqtyń túkpir-túkpirinen aidalyp kelgen adamdar qamaldy. Onyń ishinde Belarýsiiadan kelgen áielder de boldy. Búgin biz birqatar hattar men taǵdyry lagermen bailanysty adamdardyń is qaǵazdaryn ala keldik. Bul – mańyzdy qujattar, – dedi A.Lýkashenko.
Kezdesý sońynda memleketter basshylary ekijaqty qatynastardy damytýdyń ózekti máselelerin de talqylady.
