Belarýs syrtqy ister ministrligi sheteldik baspasóz quraldaryna jumys isteitin tilshilerdi túgeldei akkreditatsiiasynan aiyrdy. Ministrlik bul sheshimdi sheteldik BAQ jýrnalisterin akkreditatsiialaý tártibi ózgergendikten qabyldaǵanyn aitty.
Ministrliktiń aitýynsha, qazirgi tártiptiń kei erejeleri eskirgen, olar "media salasynyń damý deńgeiine sáikes kelmeidi". Mekeme sózinshe, jańa tártipte akkreditatsiiany alý tártibi jeńildetilgen, akkreditatsiiany qarastyrý merzimi 20 kúnnen bes kúnge azaitylǵan, al jýrnalisterge ýaqytsha akkreditatsiia kýáligin óz printerinen basyp shyǵarýǵa múmkindik berilgen.
"Biz kórshi elderdiń (Polsha, Latviia jáne basqalary) jáne Frantsiia sekildi sóz erkindiginiń tiregi sanalatyn memleketterdiń tájiribesin muqiiat zerttedik. EQYU men Akkreditatsiia institýty jónindegi Venetsiia komissiiasynyń usynystary eskerildi" delingen ministrlik habarlamasynda.
Ministrlik sondai-aq sheteldik BAQ jýrnalisterin akkreditatsiialaý suraqtary jónindegi komissiianyń quramynda jańartyp úlgergen. Komissiia jumysyn 5 qazanda bastaidy.
Syrtqy ister ministrliginiń aitýynsha, jańa tártip "shetelge Belarýs týraly obektivti jáne jan-jaqty aqparatty taratý maqsatynda qarym-qatynastyń burynnan da jańa, tiimdi ári ashyq modelin" qalyptastyrýǵa múmkindik beredi.
Azat Eýropa/Azattyq radiosy media korporatsiiasy prezidentiniń mindetin atqarýshy Deizi Sindelar Belarýs syrtqy ister ministrliginiń akkreditatsiialaý jónindegi sheshimine jóninde pikir bildirip, Azattyq radiosynyń Belarýstegi jaǵdai týraly habar taratýyn jalǵastyra beretinin, bul úshin múmkin bolǵan barlyq alań qoldanylatynyn aitty.
"Belarýs syrtqy ister ministrliginiń sheteldik BAQ-qa jumys isteitin barlyq jýrnalistiń akkreditatsiiasyn joiý týraly sheshimi kóńilimizdi qatty qaldyrdy, biraq tańǵaldyrmady" dedi Sindelar Azattyq radiosy men ózge de sheteldik baspasóz quraldaryna jumys isteitin tilshilerge onsyz da qysym kórsetilip otyrǵanyn, olardyń qýdalanyp otyrǵanyn eskertip. "Bul sheshim – barlyq belarýske belgi berip otyr. Bul Lýkashenko olardyń talaptaryna kónip, memlekettikinen ózge kózqarasqa jol bereiin dep otyrǵan joq degendi bildiredi. Belarýs halqy ózderi talap etip otyrǵan tsenzýrasyz aqparatqa, ashyq ári ádil diskýssiialarǵa qol jetkize alýy úshin Azat Eýropa/Azattyq radiosy qolda bar kez kelgen alańdy paidalana bermek".
Belarýstegi tamyz-qyrkúiek ailarynda bolǵan narazylyq aktsiialarynan habar taratqany úshin ishki jáne sheteldik táýelsiz BAQ-tyń ondaǵan jýrnalisi ustalǵan bolatyn. 29 tamyz kúni Minsk "Nastoiashee vremia" telearnasynyń jýrnalisi Roman Vasiýkovichti akkreditatsiiasynan aiyrdy. Azattyq radiosy men ARD nemis telearnasynyń tilshileri de, BBC, Reuters, AFP, Associated Press jáne RFi jýrnalisteri de Belarýs syrtqy ister ministrliginiń akkreditatsiiasynan aiyrylǵan. Ondaǵan jýrnalist birneshe kúnge qamalyp, olarǵa "buqaralyq is-sharalardy uiymdastyrýdyń jáne ótkizýdiń tártibin buzdy" dep aiyppul salyndy.
