Búgin Senattyń Konstitýtsiialyq zańnama, sot júiesi jáne quqyq qorǵaý organdary komitetiniń keńeitilgen otyrysy ótti. Onda senatorlar «Qazaqstan Úkimeti men Belarýs Úkimeti arasyndaǵy kóshi-qon salasyndaǵy yntymaqtastyq týraly kelisimdi ratifikatsiialaý týraly» zań jobasyn talqylady, dep habarlaidy "Ult aqparat".
Osy kelisim memleketterge azamattardyń kóshi-qony, kóshi-qon zańnamasyn buzýshylyqtar jáne zańsyz migratsiia joldary, sondai-aq elderdiń biriniń aýmaǵynda bolý úshin negizder bar tulǵalardyń quqyqtyq mártebesi týraly aqparattar almasýǵa múmkindik beredi.
«Resmi statistikaǵa súiensek, 2019 jyly Qazaqstanǵa Belarýstyń 32 myńǵa jýyq azamaty kirgen. Onyń ishinde 76-sy ákimshilik jaýapkershilikke tartylǵan. Búgin qaralyp otyrǵan kelisimniń mańyzy zor. Bul qujatta aqparattar men málimetter almasý túrleri, azamattardyń sanattary jáne yntymaqtastyqty nyǵaitý nysandary men negizgi baǵyttary naqty kórsetilgen. Eki eldiń kóshi-qon máselelerinde ózara árkettesetin quziretti organdary da anyqtalǵan. Qazaqstanda ol – Ishki ister ministrligi men Eńbek jáne halyqty áleýmettik qorǵaý ministrligi», – dedi senator Rysqali Ábdikerov.
Kelisim eki memlekettiń zańdaryna jáne halyqaralyq mindettemelerine sáikes Belarýs aýmaǵyndaǵy Qazaqstan azamattarynyń quqyqtaryn qorǵaýdyń tiimdiligin arttyrýǵa yqpal etedi.
