Onyń óleńderinde shý joq. Onyń óleńderi - daladaǵy jýsandai muńly, alystan talyp jeter qańbaq kóshkininiń shýyndai áýezdi. Keide tóbeden qatýly kózben qaraǵan bulttai qaharly, keide mańdaiymnan sipaǵan beitanys kempirdiń kózindei tuńǵiyq. Ózgeniń jańǵyryǵy bop ta estilmeidi, kóleńkesi bop ta kórinbeidi. Ózinikin ǵana jazady. Óz mahabbatyn, óz kúiin: mylqaý qasireti men jumbaq taǵdyryn. Bolmysymen, jan-tánimen. Asqaq keiipte. Jasyn tókpei, tamyryn kespei. Dospen de syrlaspai, qaspen de muńdaspai. Sóitip, ol esi aýysqan kezbedei jaǵada qalǵan qaiyǵyn izdeidi. Sóitip, ol "bostandyǵynyń týy sekildi shashy jelbirep keler" Jaiyǵyn izdeidi. Sóitip, ol ishindegi kúzge yntyq, kóktemge qushtar belgisiz bir keiipkerdi izdeidi. Sóitip, ol... Bári oi ekenin túsinedi. Bári - oi...
Ol - uzaq qarǵa. Óte aqyldy, qupiiasy mol hám usqynsyz(kórikti). Birde kúl sekildi sup-sur, birde tún sekildi qarańǵy. Biraq kóktemniń habarshysy da - osy. Máńgiliktiń habarshysy da - osy...
Aibol Islamǵali
Arylý
Qimastardyń qysmet biin kúz bilep
Jolda kómgen qasiretimdi eske sap,
Tyrnaq salǵan izdei bop
Ai týǵanda... alapes..
Úsh qaitara sálem salǵan ájemniń,
Betin sipap jubatatyn Qara Kesh –
Dinimiz bir týys ek qoi, Sultanym!
Minájatym qusa bolyp jazyldy
Ony qalai jyrtamyn?
Dál sol sáttiń,
Azapty sát aýǵanyn,
Oqylmaýǵa tiisti oilar serti úshin
Jyrtqan jyrlar japalaqtap jaýǵanyn,
Odan buryn jerlep turyp ózimdi,
Jan taba almai kómetin
Qorlanǵanym...
Zaryq keshken kezimdi
Sen kórdiń ǵoi,
Nege,
Nege keshiktiń?!
Endi mine, men kúl syndy tazardym,
Aqty aqqa boiaǵanda ne shyqty...
Eski kúnám jańa jyrdy bókter qyp
Tiri ekenin sezdirýi...
al, sosyn,
Syryń biler joldastaǵy óktemdik –
Qarasyndai sýyq eken ógeidiń.
Qanshalyqty shyndyq bar
Suranshaqtaý kóz jasynda kedeidiń?
Suraq qaldy.
Basqasynan aryldym.
Jan ájemdi jubat baryp Qara Kesh,
Sońǵy tisin qaǵardai bop sabyrdyń
Ai týypty –
Tanys tyrnaq tańbasy.
Meniń ápkem jasymasyn shalǵaida,
Jasymasyn meniń syrqat jambasym...
Ájim
...Kóleńkeler qaqyrai úrkip-qashyp,
Tek Ińir tur qantalap tyrtyq basy..
Túzge shyqqan Kempirdei búkireiip
Ai kórindi aiaǵyn syltyp basyp.
Sory batys bop bitken udaiy Ińir,
Óz asyǵyn iirer kúnáii kún.
Qai kógenge jýsatsam úiirińdi,
Dini bólek oilar-ai, Qudaiy bir.
Oi kúnásin keshe alsam qut qylǵany,
Jonnyń seleý shashy da bitti yrǵalyp.
Meni elitip barady Kempirsaidyń
Qoltyǵynyń jýsany jyqpyldanyp.
Túbinde azǵan kók qulqyn – joryǵanym.
Óle qalsa Qorqyttyń kóri málim...
Qanǵa jerik qoldaǵy baiany joq
Men bir semser ekenmin sory qalyń.
Ýyz tamǵan sekildi tut reńge
Eski jurttyń salady tútini órnek.
...Kempirsaidan qyzylkóz jylan qashty,
Kempir otyr kerenaý buty kernep...
Jylan qashty dariiaǵa jany qushtar,
Dariia ústi kópir tur tamyr ustap...
Tań bilindi túnektiń qara burym
Qaiyzǵaǵyn terip jep – sary mystan.
***
Deregi joq maidandarǵa kýálik!
Úmmeti joq paiǵambarǵa kýálik!
Shyjyń aýyz sari salǵan qarǵystan
Dala shatyn sýaryp
Topyraqty alǵash basqan tabannan,
Uly Únsizdik ymǵa jetken zamannan,
Qaryndasyn qatyn qylǵan qaǵannan –
Seskenbeitin boldym men
Tańdanysym tabynýǵa jetkeli.
Kári sazdar kemseń qaǵyp iekteri,
Qosh aitypty Jer betine... pendege...
Kók Qarǵaǵa ainalǵanda kók Peri.
Sodan beri teń izdedim jaý eter;
Sodan beri em izdedim táý eter;
Jeti ulyn da jerge bergen jeńgemdei,
Túsikterin sanap otyr táýekel.
Qyz jasaýyn jamaý qylǵan jarlydai;
Men senetin jazylmaǵan jarǵydai;
Aianysh pen qarǵys ertken kúnderdiń
obaldaryn dárgeiińe al, Qudai?!
Jubanatyn ajal bar...
Táńir muńsyz... mekensiz..
***
Bul kezeń – umytý kezeńi...
Ajal sepken semserdiń jaýyzdyǵy sekildi
Sen umytylasyń,
Men umytylǵandai –
kitaptar ishinen.
Kitaptar – bozdaǵym,
Kitaptar – oilardyń satqyndyǵy sekildi,
Al, jyrlar – sengisi keletin maýsymdarym ǵoi
Úsigen.
Al, jyldar...
E-he-hei, jyldar!
Ájemdei bárin jutqanym –
Qońyrlyq.
Moinyna tas bailap ólgen Oilar kezegi
Túsinem,
Ómirlik.
Bostandyǵymnyń týy sekildi jelbirep shashy
Jaiyǵym keldi.
Jaiyq – meniń jylanym!
Basyma qarǵalar qondy...
Men bárin oi dep túsindim,
Osyǵan sendim –
Túneginen boz boiaý izdep
Kúnániń.
Qalam – saǵan sert!
Qaryndasym kýá
Jańbyrǵa taǵdyrdyń uiqasatyny sekildi,
Úmitke kúdiktiń uiqasatyny sekildi
Ǵaiyp...
Jyrǵa ainaldyram dedim seni
Shydadym.
Tostym.
Omyraýly shaǵyldarymnan sezim saýatyn
Azapty oilarym qarqyldap ushty.
Qarqyldap ushqan qarǵalar syndy
Kitapqa kóshkim
keledi meniń
Jaiyq.
Jeke qońyr
Osy kúzden ekeýmiz de aman shyqpaspyz...
Ózińniń hatyńnan
«Saý bol endi, jýsanym» janyń jasyl!
Sary aýrýdai sarǵaidym saǵynǵasyn.
Jaýar bulttai túiilgen kóńilimniń,
Aspanǵa ildim idirip qabyrǵasyn.
Shekesinde qabyrǵam qula dúzdiń,
Marjandaryn janymnyń jylap úzdim.
Tas túnektiń jelbýaz búiirinen
Jyldar boiy tilgilep tún aǵyzdym...
...qar jamylǵan daladai endi aǵardym.
Qasy synǵan erindei kembaǵaldyń –
Elikteiin áýpildep sen de qaldyń,
Arqardaiyn arqyrap men de qaldym.
Sen barynda maýsymym tyraýly edi,
Úzilip túspei qos túimem qynaýly edi.
Syzdamaǵan jarany tyrnap ashqan,
Qai kitaptan juqtyrdym bul áýreni.
Topyraǵyńnan bezdiń be kóktem qusy?!
(Qorlanǵannyń keledi kektengisi!)
A, dúnie degizgen ańǵal kezim
Kún – kókten kishi...
Emdegim kep sharqatyń jii bailap,
Taǵy keldim qaraǵash kúiik aidap.
...sen otyrsyń es-tússiz áz anańnyń
Aq jaýlyǵyn basyńa kiip oinap...
