Prolog
1-epizod
Bəri oidan bastaldy…
Ol zamanda oi qarq etetin. Ol zamanda qunys qariia syndy qanatyn artqa salǵan oi qaiqy tumsyǵymen duǵasyn kúbirlep maimaqtanyp júrip bara jatatyn shartaraptarǵa. Oidyń qanaty syńar, qaýyrsyny maqpal edi. Oidyń túsi qara bolatyn ol zamanda, dəp Haýanyń qursaǵy syqyldy. Qara – jaryq, jaryq – aǵys edi ilkide. Qara jarqyrap aǵatyn. Ómir oi edi. Ajal oi edi. Tiianaq… Təj… Məńgilik – Oi, Oi – Qarǵa dep atalatyn ol qaýymnyń tilinde…
Jalańash taýdyń jyrtqysh tisterine ilingen kún qantalap qulady. Ińirdiń qanjosa didary kókjiekte kólbeidi. Kókjiek taýdyń azýly tisteri. Ińir – bədiz. Taý qoltyǵyndaǵy Ilki bastaýlar dariiasynan qarmaǵyna túspegen oilardy aýlap otyrǵan shəkirttiń jelke tusyndaǵy kúdireigen butaly kəri aǵashqa qarǵa qondy. Sol-aq eken shəkirttiń basynda bir oi qarq etti. Sóitti de dərýish turpat, diýana siyq, əýlie shyrai paiǵambarǵa buryldy.
Shəkirt. Ýa, muǵjizaly jalǵyzym, paiǵambarlyq mórińe sert, men saǵan erdim. Ol bərin kóre me?
Dereksiz paiǵambar. Ei, ajaldan keiingi ómirde oń jaǵyma jaiǵasqan jeke qońyrym bolýmen súiinshilengen úmmetim, Oǵan sert, Ol oiyńdy da kóredi.
Shəkirt. Ýa, muǵjizaly jalǵyzym, oiym qumarǵa beiil.
Dereksiz paiǵambar. Onyń aty – Kúnə…
Shəkirt. Kúnə? Ýa, Onyń súiiktisi, kúnə degen ne?
Dereksiz paiǵambar. Kúnə – keshegi bar, búgingi kóp, erteńgi…Ińirdiń qabaǵyn baǵyp únsiz qaldy.
Shəkirt. Iə, erteńgi?..
Dereksiz paiǵambar. Ińirden ne kórdiń?
Shəkirt. Ýa, Onyń elshisi, ińir jaýyn jeńgen batyrdyń jarasynan aqqan qandai sulý kórinedi.
Dereksiz paiǵambar. Ińirde kúnəniń kelbeti jasyrýly…
Shəkirt. Ýa, men sezbesti sezýshim, jumbaǵyń maǵan qarańǵy.Paiǵambar kiiz tysty kitabyn ashyp edi, daraqtaǵy qarǵa qanatyn bir silkidi de kitaptyń ishine kelip qondy.
Dereksiz paiǵambar. Sońǵy aiat!
Shəkirt. Ýa, Odan keiingi sengenim, oida týǵan jer bar ma?
Dereksiz paiǵambar. Oidyń týmysy Təńir, qonǵan jeri hat.
Shəkirt. Ýa, sońǵy kórerim, menen ózge úmmetiń joq. Təńirdi kim tanysyn?
Dereksiz paiǵambar. Meniń úmmetim oilar…
Osyny aitqanda jaqpar tastardyń tasasynda jasyrynǵan qudaisyzdar tutqiyldan semser ala júgirdi. Qapelimde qapy qalǵan shəkirt sońǵy demin aiqasta úzdi. Sonda paiǵambar kiiz tysty kitabyn ashyp jiberip otty janaryn jas jýyp duǵa etti…
Dereksiz paiǵambar. Ýa, Təńir syilaǵan úmmetim Oilar, qiiandarǵa qarqyldap ush. Dəýirińnen jyraqqa súmbiledei jarqyldap ush. Qalap týǵandardyń kezegin kút. Syzdai-syzdai jarylar ózegin kút. Təńir qalaýymen paiǵambarlar men aqyndardyń basyna qon, hat etsin. Zamanaqyrǵa búlinbei jet. Úmit shýaq únimdei jet. Təńir jar! Təńir jar…
Əlqissa, muǵjiza! Kitapqa qonǵan aiattar qarǵaǵa ainalyp kókti búrkep usha jóneldi. Aspandy kernegen oilar ma, tún be? Kim bilgen…
2-epizod
JOLDA
Bozamyq aýaǵa shań kóterilip, tóńirekte túlik jamyrai, qońsynyń tynyshyn túrtip kesh qonaqtady, aýyl keshi. Əlettiń mamyrajai, ia qamyryqty bolatyny asyly, kisiniń ózi oilap tapqan sergeldeń, kóńil kórinisi. Əitpese, kúnniń qulaqtanýy da eskishe, kúnniń baiýy da baiaǵysha. Ózgergen dym joq. Ózgergen aýyldyń teristigindegi jalǵyz tam-úidiń tirshilik təleii ǵana…
Kúnqaqty tozǵan jaialyqtyń ústinde aýnaǵan súlesoq, óńi qashqan səbi əlsiz jóteldi de, ókpesi syryldap dem shyǵarmai jatyp aldy. Úi ishindegilerdiń de demderi ishinde. Úreidiń demi. Səbidiń tanaýynan syryldap dem shyqty-aý bir kezde…
Sheshesi. Tiri eken…
Əjesi. Təit əri. Jamandyq shaqyrýǵa kelgende júirigi-ai tilderińniń, túge.
Sheshesi. Kókesi?
Əkesi. Taýyp kelem bəribir.
Sheshesi. Emhanaǵa taǵy, taǵy bir ret…
Əkesi. Kene bop jabystyń da qaldyń-aý sol emhana degen bəlege. Kóziń aǵarmasyn!
Əjesi. Yryldasyp bitseńder tyńdańdar meni. Kók taýdyń basyna shyǵaryp samalyna betin tostyq, kók aidynda eskek esip aýasyn jutqyzdyq, kók qarbyzdyń qyzyl etin syǵyp sólin ishkizdik. Endi sońǵy serti qaldy…
Əkesi. Kók qarǵa… kók pen jerdi kezsem de tabam.
Sheshesi. Tabylmasa she?!
Əkesi. Tabylady.
Sheshesi. Tabylǵanǵa sheiin…
Əkesi. Ói, mynaý əkk…kireń-degen neme, kóziniń sorasyn buldap bolmady-aý!
Sheshesi. Ala siyrdy satsaq, dərigerdiń aitqan…
Əkesi. Men sony aiap otyr ma ekenmin. Dərigerińniń aitqany em boldy ma?
Sheshesi. Sen aiaisyń baladan.
Əkesi. Ne dediń?!
Səbi taǵy da əlsiz jóteldi de, ókpesi syryldap dem shyǵarmai jatyp aldy. Bəri demderin jutyp, únsiz qaldy.
Əjesi. A, dúnie…
***
3-epizod
Jas aqyn. A, dúnie…
Oidy serik qyp aiańdaǵan adamnyń tez jetetin ədeti emes pe? Bul da qalai jetkenin ańdamai qaldy. Túndi sergitken jazǵy meiramhananyń kireberisindegi daiashy saýalmen kútip aldy ony.
Daiashy. Qalai dedińiz?
Jas aqyn. Túsinbedim?
Daiashy. Əlginde birdeme aittyńyz ǵoi.
Jas aqyn. Dúniedegi sulýlyq bitken sizge shaqtap berile salǵan eken dedim.
Daiashy. Dosyńyz sizdi kútip otyr…
Ol dosyna qarai aiańdady.
Jas sýretshi. Kóziń jetken jerden sulýlyq izdep júretin ədetiń-ai seniń!
Jas aqyn. Muny oiyń jetken jerden dep túzep qoisam…
Jas sýretshi. Kórý oidyń shyraqshysy emes pe?!
Jas aqyn. Men logikaǵa senem.
Jas sýretshi. Logika poeziiany tym aqyldy qylyp jibermei me?
Jas aqyn. Joq, kerisinshe tylsymǵa, jannyń tylsymyna tereńdeýge sep bolady!
Jas sýretshi. Senimdi aittyń.
Jas aqyn. Keide kúmənniń senimdi estiletin de ədeti bar.
Jas sýretshi. Bul óz darynyńa degen kúmən bolsa she?
Jas aqyn. Haltýrshikterdiń keremet qasieti bar: olar ózderiniń haltýrshik ekenderin bilmeidi. Məselen, sen ózińdi haltýrshik dep esepteisiń be?
Jas sýretshi. Byt ne mojet!
Jas aqyn. Men de solai. Demek, ekeýmiz de…
Qarqyldasyp kúldi.
Daiashy. Ne qalaisyzdar?
Jas sýretshi. Dosymnyń qalaýy, sizge óleń arnaǵysy keledi.
Daiashy. Ənshisizder me?
Jas aqyn. Óleń men ənniń aiyrmashylyǵyn bilmeitin be edińiz?!
Jas sýretshi. Jəraidy, jəraidy. Taǵy qaitalai salyńyz.
Daiashy ketip barady.
Jas aqyn. Dese de, bireýdi kemshiligi úshin kinəlaýǵa bola ma…
Jas sýretshi. Osy qyz jaily jazsa, qalai jazýǵa bolady?
Jas aqyn. Anyq dalalyq peizaj arqyly emes.
Jas sýretshi. Oiymyz bir jerden shyqty. Shynynda qalalyq mənerdegi keskinge suranyp tur. Natýrashynyń bitiminen bastap bolmysyna deiin qai baǵyt, qai stil, qai aǵymdaǵy óner týyndysyna ainalatynyn ózi aityp turady. Qyzyq, ə!
Jas aqyn. Asyly, adamdar, qarapaiym adamdar múmkin əlsizdigin, múmkin eń aiaýly sezimderin jasyrý úshin, qorǵaý úshin nemquraidy sóileýge tyrysady. Al biz jazǵanda kóp sóileimiz, kóp núkteniń ornyna talǵamsyz qyzdyń betine jaqqan artyq boiaýlardy súikegimiz keledi.
Jas sýretshi. Baiaǵy súrleýde kimder júrmedi?! Geniiler de, shabandar da júrdi. Abad joldyń boiyndaǵy grafomandar men qartaiyp aljyǵandardyń qaldyrǵan qoqystarymen júrgiń kelmese, óz soqpaǵyńdy sal.
Jas aqyn. Jivopiste belgili dərejede erkindik bar. Al poeziiada basqasha…
Jas sýretshi. Men poeziia men jivopistiń aiyrmashylyǵyn emes, uqsastyǵyn kóbirek tabamyn.
Jas aqyn. Za mify…
Jas sýretshi. Tyńdaǵannan góri aitqandy jaqsy kóretin adamdar bolady. Biz solar sekildi moralist bop baramyz.
Jas aqyn. Sebebi biz ózimizge belgili dúnieler jaiyn qaýzap otyrmyz. Shyndyǵynda tyńdaǵymyz keletini de, aitqymyz keletini de basqa.
Jas sýretshi. Ras, men óz ómirimdi jazǵym keledi. Əttegen-ailarymdy túgendegim keledi.
Jas aqyn. Shynymdy aitsam, ózim úshin syily adamdardyń óz taǵdyry jaily əńgimesin estýge qorqam. Jazyp qoiýdan qorqam. Olar maǵan meili intimdik qatynastaryn, meili kórgen qorlyǵyn, meili kúnəlaryn, ne bolǵanda da bərinen jasyrǵan syrlaryn aitady ǵoi.
Jas sýretshi. Mundaida únsizdik sóilegeni durys…
Olar oiǵa shomdy.
***
4-epizod
Aýyldan oqshaý qonǵan baqsynyń qujyrasy…
Əjesi. Amansyń ba, Ulbike kelin.
Baqsy. Kelin deýińdi qoimadyń-aý sen qaqpas. Zamanymyz bir edi ǵoi.
Əjesi. Shalymnyń joly úlken.
Baqsy. E-e, shaldy eske salma, shaldy eske salsań qyrshyn ketken qos uldyń da kúiigi qozdai ketedi myna sher keýdede.
Əjesi. Aýlańa jyn-perini túnetken ózińnen de bar.
Baqsy. Meni tabalaýǵa keldim de… Zəýzatyn jutqan jalmaýyz kelin atanǵanym az ba edi.
Əjesi. Osy otyrǵan ekeýmizdiń jalmaýyz kempirden ne aiyrmamyz qaldy qurǵyr-aý.
Baqsy. Al, kel…
Əjesi. Kempirshýaqtap kep qaldyq.
Baqsy. Balanyń beti beri qarady ma?
Əjesi. Sońǵy serti qaldy. Qaýyrsynyn buldap kók sharlap ketetini ne eken osy qus bitkenniń. Tabylmai jatyr.
Baqsy. Qanaty bolǵan soń ushady da.
Əjesi. Kók qarǵany qaidan qydyraiyq? Surashy ana perilerińnen, oń iyǵyńdaǵysynan sura!
Baqsy. (uzaqty sholyp) Jaýyn jaýar ma eken, ə. Kókdolylanyp kele jatqan bultty qara, kókjótel býǵandai bop.
Əjesi. Atama, atama atyń óshkir kókjóteldi!..
5-epizod
OQYRMAN AVTORDY SOTTAI ALA MA?
Daiashy. Keshirińiz? Keshirińiz…
Jas aqyn. A, iə. Aita berińiz.
Daiashy. Taǵy tapsyrys beresizder me?
Jas sýretshi. Qaitalai salyńyz.
Jas aqyn. Oidyń zyndanynan shyǵar baishubardyń qylquiryǵy qaida dersiń…
Jas sýretshi. Jə, əńgimeniń aýanymen jaǵdai da suraspappyz ǵoi.
Jas aqyn. Kishkentai qalai, ósip jatyr ma?
Jas sýretshi. Kúnnen-kúnge qylyq shyǵarady.
Jas aqyn. Sonysymen tətti ǵoi bala degen.
Jas sýretshi. Qyzyq, əli jasqa tolmaǵan nəreste aqshany biledi. Jylap otyrǵan jerinen aqsha berseń ýana qalady-ei! Aqshaǵa qarap turyp jadyrai kúletinin qaitersiń.
Jas aqyn. Instinkt…
Jas sýretshi. Olai bolsa Shopengaýerdiń «instinkt teoriiasy» shyn bolǵany.
Jas aqyn. Shopengaýermen osy túisik məselesinde dostasyp ketetinimiz bar.
Jas sýretshi. Biraq Shopengaýer bala súiýden bas tartty ǵoi.
Jas aqyn. Ol mashaqattan qashqan bolý kerek.
Jas sýretshi. Bizdiń Shopengaýer bola almaitynymyz da osydan. Əitkenmen, otbasyńdy baqytty ete otyryp, shyǵarmashylyǵyńdy biikke kóterý əldeqaida mərtebeli emes pe?!
Jas aqyn. Bizdiń qoǵamda bul erlik bolýy da múmkin.
Jas sýretshi. Ózińniń qashan úilenbek oiyń bar?
Jas aqyn. Qorqam…
Jas sýretshi. Məseleniń tórkinin tamsadym. El baiymai rýhaniiat eshqashan damymaidy. Ashqursaq qoǵamǵa ədebiet, óner ataýlynyń qajeti shamaly. Al, óner týdyrýshylardyń ózderi ash bolsa she…
Jas aqyn. Materialdyq qajetterin ótei almai əiel-balamnyń aldynda tómen qaraǵym kelmeidi, dosym.
Jas sýretshi. Bul sebep emes, biraq. Qosymsha ədebiet pəniniń muǵalimi bolyp ta isteýińe bolady. Sen filologiiany bitirdiń ǵoi.
Jas aqyn. Ustazdyq ǵanibet, ərine. Biraq men ədebiet pəniniń muǵalimi bola almaimyn. Mektep baǵdarlamasyndaǵy avtorlardyń shyǵarmashylyǵyna, ómirine qatysty jeke kózqarasym bar. Balalardy qalai aldaimyn.
Jas sýretshi. Keshir, biraq… Balalar basylymynda nege istep júrsiń onda?
Jas aqyn. …
Jas sýretshi. Jumysqa haltýra dep qaraimyz.
Beitanys kisi. (jandaryna kelip, kilige ketip) Sebebi, ómirdiń ózi haltýra! Otyraiyn, iə? Men batystyń filosofiiasyn taýysqan adammyn. Shyǵystyń oishyldaryn zerttedim. Mynaýyń dəmdi ǵoi…
Jas aqyn. As bolsyn.
Beitanys kisi. Əkem oqymysty bolatyn. Ərip tanyǵannan bastap shaldardy oqytty. Shaldar myqty. Sender, jastar aman bolyńdar! Aqynsyńdar ma nemene?
Jas sýretshi. Tanysyp otyryńyz, myna jigittiń esimi Bodler, meniń atym Pikasso.
Beitanys kisi. Onda meniń Qojanasyr bolǵanym ǵoi.
Jas sýretshi. Siz ne kókip otyrsyz!
Beitanys kisi. Shaldarǵa kúshteriń jetedi, ə… Shaldarmen oinapsyńdar. Shaldarǵa jetý qaid-də! Men de aqynmyn. On bes jasymda Bairondy oqydym. Meni qurtqan Bairon. Birden aptyǵymdy basty, janbai jatyp sóndim. Bodler jaily Geteden asyp aita almaspyn. Al Pikasso pysyq, jaǵdaiyn jasaýdy da umytpaǵan. Bai ǵoi. Abai da bai bolǵan. Men sender ziialy dep ataityn danyshpandardyń bir-birine jasaǵan qiianattarynyń bərin bilem.
Jas aqyn. Siz qiianat jasamap pa edińiz?
Beitanys kisi. Meniń de qiianatym bar. Amalsyz! Zaman sondai boldy. Sender ol zulmatty kórmeńder. Ha! Sender shaldarmen oinapsyńdar…
Daiashy. Shyǵyp ketýińizdi suraimyn!
Beitanys kisi. Sen Nitssheni bilesiń be? Kantty she?
Daiashy. Aiǵai salmai shyǵyp ketińiz?!
Beitanys kisi. Moneni bilesiń be? Van Gog? Qudaiym-ai, ózimizdiń Tańsyqbaevty biletin shyǵarsyń?
Daiashy. Bastyq ursyp jatyr.
Beitanys kisi. Bastyǵyń da bilmeidi seniń! Men Basheni oqyǵam. Balzakty, Markesti, Dostoevskiidi… Dostoevskii ne deýshi edi əlgi. Sendeiler jaily aitatyny bar edi ǵoi. Tilimniń ushynda tur.
Jas sýretshi. Siz aitqan esimder sonshalyq tańsyq emes, aqsaqal.
Daiashy. Politsiia shaqyramyn!
Beitanys kisi. Men eshkimnen qoryqpaimyn! Ministr dosyma aitsam sazailaryńdy beredi.
Daiashy. Shaqyryńyz ministr dosyńyzdy.
Beitanys kisi. Onyń mundai usaq sharýalarǵa bas aýyrtýǵa ýaqyty joq. Dostoevskii ne dep edi…
Kúzetshiler beitanys kisini alyp ketti.
Jas aqyn. Jyndanyp ketpes úshin de jazý kerek shyǵar.
Jas sýretshi. Ne kedergi?
Jas aqyn. Meniń bir dosym bar, eshqandai kitap oqymaǵan. Biraq onyń sumdyq oqyǵysy keledi.
Jas sýretshi. Ne kedergi?
Jas aqyn. Sen ekeýmizdiń de sumdyq jazǵymyz keledi. Solai ǵoi?
Jas sýretshi. Solai.
Jas aqyn. Ne kedergi?..
Olar taǵy da únsiz qaldy.
6-epizod
Kún astynda kúbirlep kempir ketip barady…
Əjesi. A, Qudai! Meniń de kúnim taiaý. Shalymnyń aldynda júzimdi tómen qaratpa. Osy əýlettiń tileýin tileýden basqa ne qaýqar qaldy dep em, shatyppyn. Mashaqatyń taýsylmapty da. Qaiǵynyń jeti atasyn tanystyryp eń ǵoi, munyń ne?!
Ýai, kók qarǵa! Tabylsań etti. Seniń qanatyń em eken. Qaýyrsynyńnan az ǵana alam da, bosatam ǵoi. Búkireiip sen qashasyń, búkireiip men qýamyn.
Jetkizbeisiń-aý, a, dúnie…
***
7-epizod
Jas aqyn. Otandy súiý úshin saýat kerek pe?
Jas sýretshi. Kerek, kerek… Əitpese, biz tobyrlyq sananyń jeteginde ketemiz.
Jas aqyn. Onda əlginde aitqan Shopengaýermen qaitadan eregesip qalamyz. Instinkt, túisik…
Jas sýretshi. Bəri de jetilý arqyly kórkemdikke jetedi ǵoi.
Jas aqyn. Otan degen ne?
Jas sýretshi. …
Jas aqyn. Qazaq degen kim?
Jas sýretshi. Óziń túsinetin nərseni basqaǵa túsindire almaityn kezder bolady eken…
Jas aqyn. Men taptym. Otan degen – oi. Qazaq degen – oi. Uǵymdar da, derekti zattar da oi arqyly dúniege keldi. Bizge oidy keskindeý kerek.
Jas sýretshi. Qandai boiaýmen?
Jas aqyn. Buny… Məselen, oida pishin bola ma?
Jas sýretshi. Iə, keskini ózimen birge.
Jas aqyn. Oi kelgende, jaraidy, jyr kelgende óz formasymen keledi. Qansha býyndy, qai uiqaspen degen syqyldy… Al, býynǵa, keide uiqas myǵymdyǵyna baǵynbaityn pishinde kelse she?
Jas sýretshi. Jumeken túrik aqyndaryn aýdarǵanda bizdiń qalypty óleń jazý formasymen emes, solardyń formasymen aýdardy ǵoi. Biraq, óz óleńderinde muny paidalanbaýǵa tyrysty.
Jas aqyn. Nege?
Jas sýretshi. Dəstúrge adaldyq shyǵar.
Jas aqyn. Qara óleńnen ketpeý adaldyq bolýy múmkin, biraq óz jolyńdy izdeý satqyndyq emes.
Jas sýretshi. Ərine. Óz basym dəstúrge adaldyqqa kelgende formaǵa qatyp qalmas edim.
Jas aqyn. Gəptiń tórkini mazmunda.
Jas sýretshi. Adam janyna úńilýdiń arnaiy zańdylyǵy bolmasa kerek.
Jas aqyn. Kúnə jaily uǵym bolmaǵan dəýirler týraly jazǵym keledi meniń. Biraq, qalai? Qudaidy tanyǵanǵa deiingi jyrlar qalai bolýy yqtimal, Qudaidy tanyǵannan keiingi jyrlar qalai bolmaq?
Jas sýretshi. «Gamlet bərimizdiń ishimizde…»
Jas aqyn. Kelgen býyndardyń tarihqa soǵa beretininiń sebebi, ərýaqtar tynyshtalǵan joq əli.
Jas sýretshi. Qazaqtyń qylqalamy da, qalamsaby da babalarynyń joǵalǵan bastaryn túgendep úlgermegenin de qosyp qoi.
Jas aqyn. Kúnniń kún ekenin túsiný úshin aqylǵa júginý qazirkúlkili, ərine. Ədebietke, jivopiske, esi durys óner juratyna jańa mazmun qajet ekenin aǵa býynnyń túsine almai otyrǵany she, kúlkili emes pe?
Jas sýretshi. Jalǵyz oinap ósken búldirshin qyzdan qandai əiel shyǵýy múmkin?
Jas aqyn. Qyzǵanshaq. Qonaǵyna dastarhan jaimaityn…
Jas sýretshi. Aǵa býyn soǵan uqsap bara jatyr desem she?
Jas aqyn. Joq. Aǵa býyn naizany bizden buryn ustaǵan. Olardyń mərtebesi qashanda biikte. Tek jastarǵa túsinistikpen qaraǵanyn ǵana qalaityn edim.
Jas sýretshi. (qarqyldai kúlip) Biz bosqa əýrelenip otyr ekenbiz!
Jas aqyn. Nege?
Jas sýretshi. Sen ekeýmizdiń shyǵarmashylyǵymyzǵa qandai kózben qaraý úshin de, jazǵan dúniemiz bolýy kerek qoi. Bizde ne bar?!
Jas aqyn. Basheniń «Ómir boiy bes shýmaq jazǵan aqyn – has aqyn, al on óleń jazǵan aqyn – dana aqyn» deitini bar edi ǵoi. Otyzǵa deiin birneshe jylymyz bar…
Jas sýretshi. Keide kúmənniń senimdi estiletin de ədeti bar, iə!
Jas aqyn. (ezýinen kúlip) Ómiri kino túsirip kórmegen adamnyń jańasha kino jasaǵysy keletini siiaqty bizdiń həl…
Daiashy. Mine, esepshottaryńyz.
Jas sýretshi. Siz bara berińiz, ózimiz shaqyramyz.
Daiashy. Jaraidy, jyldamdatarsyzdar. Biz jabylǵaly jatyrmyz.
Eki dos qaltasyn qarmandy da, bir-birine qarady… Anadaidan, kóshe boiynan bir kisiniń daýsy estiledi. Úzik-úzik…
8-epizod
Kóshe boiyndaǵy shalshyqta bir beitanys aýnap jatyr… Ol shynynda da myqty aqyn bolǵan shyǵar, kim biledi? Dereksiz… Onyń kim ekenin ózi, sosyn Almatynyń shejireli kósheleri biledi. Biraq óz zamany túsinbegen adamdy búgingi zaman túsine me?!. Ol múmkin…
Beitanys kisi. Men batystyń filosofiiasyn taýysqan adammyn. Shyǵystyń oishyldaryn zerttedim. Shaldarǵa kúshteriń jetedi, ə! Shaldarmen oinapsyńdar. Shaldarǵa jetý qaid-də! Men qundylyqtarǵa qiianat jasamaǵam, eshqashan! Men aqynmyn ǵoi, aqyn! Meniń túbime jetken Bairon… Ə, shaldarǵa kúshteriń jetedi, ə! Shaldarǵa jetý qaid-də senderge…
***
9-epizod
Kóshe boiyndaǵy kəri aǵashqa qarǵa qondy…
***
EPILOG
Kók qarǵa tabylypty…
Bekzat SMADIIaR
